[A:293]མཁན་པོ་ཞུས་ནས་བསྙེན་པར་ཡང་རྫོགས། ངའི་ཐད་དུ་བྱུང་བ་ལ་ཁྱོད་ནན་ཏན་ཆེ་གསུང་ནས་མཉེས་པ་ཐོབ། དེར་ལྷ་རྗེ་ཟླ་བའི་འོད་ཟེར་དགུང་ལོ་དྲུག་ཅུ་ལ་གཤེགས་པའི་འདད་དང༌། གདུང་ཁང་ས་འབུམ་དང་བཅས་པ་རྣམས་བཞེངས་པ་དང༌། སློབ་མ་རྣམས་ཀྱི་ཆོས་འཕྲོ་སྡུད་པ་ལ་ཟླ་བ་དྲུག་བཞུགས། རང་ལོ་ཉི་ཤུ་རྩ་གསུམ་བཞེས་པ་ལ་དབུས་སུ་ཕེབས་ནས་གདན་སར་བཏོན། དེ་ནས་སོག་ཏུ་བྱོན་ནས་ལོ་གཉིས་གསུམ་ཙམ་འདག་འབྱར་སྒྲུབ་པ་མཛད། ཚུར་བྱོན་ལུ་རུའི་བྲག་དང༌། འགར་བྲག་དང༌། ཡང་དབེན་རྣམས་སུ་ལོ་གསུམ་གསུམ་བཞི་བཞི་ཙམ་གྱི་འདག་འབྱར་དང་སྒྲུབ་པ་མཛད། དེ་ཡང་ལུ་རུའི་ཕུ་བྱན་ཀླག་བྲག་ལ་བཞུགས་ཙ་ན། མ་གཅིག་ཞ་མ་ཉིད་གདན་རིན་པོ་ཆེའི་ཁྲི་སེང་གེ་དང་གླང་ཆེན་གྱིས་བཏེག་པ་ལ་བཞུགས། གཡས་ན་དཔལ་མོ། གཡོན་ན་སྒྲོལ་མ་གཉིས་ཀྱང་པད་ཉིའི་སྟན་ལ་ལྡེམ་སྐུར་བཞུགས་པ་འོད་འཕྲོ་བ་དང་བཅས་པ་གཟིགས། དབང་བཞི་རྫོགས་པར་བསྐུར། མཉམ་ཉིད་ཀྱི་ལམ་ལ་གཉིས་འཛིན་གྱི་འཁྲུལ་པ་མི་བྱ། སོ་སོར་རྟོག་པའི་ཤེས་རབ་ཀྱིས་དཔྱད་ལ་བསྒོམ་ཞེས་བྱ་བ་ལ་སོགས་པ་གསུང༌། དེ་ནས་བཟུང་སྟེ་ནམ་སྐྱོ་ཙ་ན་འབྱོན། ཆོས་གསུང༌། རྨང་ལམ་དུ་ཡང་འབྱོན། སྒྲོལ་མ་རྒྱ་མཚོའི་རྒྱུད་ལ་སོགས་པ་ངས་མང་བར་མཁྱེན་པས་གསོན་ཅིག་གསུང༌། དུས་རྟག་ཏུ་བྱ་བ་ཆེ་ཆུང་ཐམས་ཅད་ལ་མཁའ་འགྲོ་མས་གྲོགས་བྱེད། གཞན་གྱིས་མཐོང་བར་འོད་བཀྱེ་བ་དང༌། ཞབས་ཀྱི་རྗེས་ལ་སོགས་པ་མང་པོ་བྱུང༌། སྤྱིར་བསྟན་པའི་བྱ་བ་འབའ་