[A:297]
དུམ་བུ་ལྔ་པ། ཇོ་བོ་རྗེ་བརྒྱུད་པ་དང་བཅས་པའི་སྐབས།
ཇོ་བོ་དང་འབྲོམ་སྟོན་དང་ར་སྒྲེང་གི་སྐབས།
ད་ནི་དཔལ་མར་མེ་མཛད་ཡེ་ཤེས་ཀྱིས་བོད་དུ་ཐེག་པ་ཆེན་པོའི་ལམ་སྲོལ་ཇི་ལྟར་རྒྱས་པར་མཛད་པའི་ཚུལ་བྲི་བར་བྱ་སྟེ། དེ་ལ་བླ་མ་ཆེན་པོ་དེ་ནི། རྒྱ་གར་བ་རྣམས་ས་ཧོ་ར་ཞེས་ཟེར་ཞིང༌། བོད་རྣམས་ཟ་ཧོར་ཞེས་འདོན་པའི་ཡུལ་འཁོར་ཆེན་པོ་དེའི་རྒྱལ་པོ་དགེ་བའི་དཔལ་ཞེས་བྱ་བ། མངའ་ཐང་རྒྱ་ནག་སྟོང་ཁུན་རྒྱལ་པོ་དང་མཉམ་པ། ཕོ་བྲང་གསེར་གྱི་རྒྱལ་མཚན་ཅན་ཞེས་བྱ་བར་བཞུགས་པ་དེ་དང༌། བཙུན་མོ་དཔལ་གྱི་འོད་ཟེར་ཅན་ཞེས་བྱ་བ་གཉིས་ལ། སྲས་ཆེ་བ་པདྨའི་སྙིང་པོ། འབྲིང་པོ་ཟླ་བའི་སྙིང་པོ། ཆུང་བ་དཔལ་གྱི་སྙིང་པོ་སྟེ་གསུམ་མངའ་བ་ལས། རྗེ་བཙུན་འདི་ནི་འབྲིང་པོ་ཟླ་བའི་སྙིང་པོ་ཡིན་ནོ། །ཆུང་ངུའི་དུས་ནས་ཚེ་རབས་ཀྱི་ཡི་དམ་བཅོམ་ལྡན་འདས་འཕགས་མ་སྒྲོལ་མ་མངོན་སུམ་དུ་གཟིགས། དེའི་མཐུས་རྒྱལ་སྲིད་ལ་མ་ཆགས་པར་ཡུལ་གཞན་