[A:28]བཟང་བ་ཞིག་མཐོང་ནས། རྒྱལ་པོ་དེ་ཙ་ན་སོང་སྟེ་བཀྲ་ཤིས་པར་གྱུར་ཅིག་ཅི་སློང༌། བུ་རམ་ཤིང་པ་འཕགས་སྐྱེས་པོ་བཙུན་མོ་དམ་པ་གུམ་པས་སྲས་མོ་སློང་ངོ༌། རུང་མོད་ཀྱི་དམ་ཞིག་བཅའ་སྟེ། ངའི་བུ་མོ་ལ་ཁྱེའུ་བྱུང་ན་རྒྱལ་སྲིད་དུ་འཇོག་ན་སྦྱིན་ནོ། བགྱིའོ་ཞེས་གསོལ་ནས། བུ་རམ་ཤིང་པ་འཕགས་སྐྱེས་པོ་ལ་སྨྲས་པས། ཕུ་བོ་བཞག་ནས་ནུ་བོ་རྒྱལ་སྲིད་ལ་ཇི་ལྟར་བཞག དོན་འདི་ལ་ངེས་པ་མ་མཆིས་ཏེ། བུ་ཚ་འབྱུང་བའི་ངེས་པའང་མེད། བྱུང་ནའང་བུ་དང་བུ་མོ་གང་འབྱུང་གི་ངེས་པའང་མ་མཆིས་སོ་ཞེས་སྨྲས་པས། དེ་བླངས་ཏེ་དགའ་མགུར་སྤྱད་པས་བུ་གཅིག་བྱུང་བ། མ་སྐྱེས་པ་ནས་རྒྱལ་སྲིད་འདོད་པས་རྒྱལ་སྲིད་དགའ་ཞེས་མིང་བཏགས་སོ། །དེ་ཆེར་སྐྱེས་པ་དང་རྒྱལ་སྲིད་ལ་མ་བཞག་པ་ཞང་པོས་ཐོས་ནས་ཚིག་རྩུབ་པོ་དང་བཅས་པས་སྤྲིངས་པ། ཁྱོད་སྔོན་ཁས་བླངས་བཞིན་བྱེད་ན་ལེགས། མི་བྱེད་ན་མཐུ་བསྐྱེད་ལ་སྡོད་ཅིག ཁོ་བོ་འོ་ནིར་འོངས་ལ་ཡུལ་འཁོར་བུར་མར་བརླག་གོ་ཞེས་སྤྲིངས་པ་དང༌། འདི་ལ་ཇི་ལྟར་རྒྱལ་སྲིད་དགའ་རྒྱལ་པོར་དབང་བསྐུར་མོད། ཕུ་བོ་བཞག་ནས་ནུ་བོ་དང་བསྐུར་བ་འོས་པ་མ་ཡིན་ནོ། རྒྱལ་པོ་དེ་ནི་སྟོབས་དང་ལྡན་པས་འདི་དབང་བསྐུར་ལ་གཞོན་ནུ་རྣམས་སྤྱུག་ཏུ་གསོལ། ཉེས་པ་མེད་པར་ཇི་ལྟར་སྤྱུག བདག་ཅག་ནི་བློན་པོ་ལགས་པས་ལྷའི་དོན་སེམས་ཤིང་ཉེས་པ་མེད་པའང་སྤྱུག ཡོད་པའང་འཇོག་གོ ཅང་མི་སྨྲ་བ་དང་བློན་པོ་རྣམས་གྲོས་བྱས་ཏེ་གཞོན་ནུ་རྣམས་རྒྱལ་པོའི་ཐུགས་ཕྱུང་བའི་ཐབས་བྱའོ་ཞེས་བགྲོས་ནས། སྐྱེད་