[A:299]མོ་གསན། ཁོང་ཉན་ཐོས་པ་ཡིན་པས་ཞག་བདུན་བདུན་ན་གནས་ཁང་འཕོ་བ་མཛད། གཞན་ཕ་རོལ་ཏུ་ཕྱིན་པ་དང༌། གསང་སྔགས་ཀྱི་ཆོས་གསན་པའི་བླ་མ་ཛྙཱ་ན་ཤྲཱི་མི་ཏྲ། ཀུ་ས་ལི་ཆུང་བ། ཛེ་ཏཱ་རི། ནག་པོ་ཞབས་ཆེན་པོ་སྟེ་བ་ལིཾ་ཨཱཙཱརྻ་ཡང་ཟེར་བ། ཨ་བ་དྷཱུཏཱི་པ་ཆུང་བ། ཌོམྦཱི་བ། རིགས་པའི་ཁུ་བྱུག མ་ཏི་ཛྙཱ་ན་བོ་དྷི། ནཱ་རོ་པ། པནྚི་ཏ་མི་ཆེན་པོ། བྷཱུ་ཏ་ཀོ་ཊི་པ། མཁས་པ་ཆེན་པོ་དཱ་ཆེན་པོ། ཤེས་རབ་བཟང་པོ། བྱང་ཆུབ་བཟང་པོ་རྣམས་དང༌། ཁྱད་པར་དུ་རནྟ་ཨཱ་ཀ་ར་ཤཱནྟི་བ་ལ་བརྒྱུད་པ་ཐ་དད་པ་མང་པོ་ལས་བརྒྱུད་པའི་ཆོས་མངའ་བས། ཕལ་ཆེར་དེ་ལ་གནས། ཕྱིས་བླ་མ་གསེར་གླིང་པའི་ཐད་དུ་བྱོན་ནས། བྱང་ཆུབ་མཆོག་ཏུ་སེམས་བསྐྱེད་པ་གཙོ་བོར་བྱས་པའི་གདམས་པ་མཐའ་ཡས་པ་གསན་ཞིང༌། ཕལ་ཆེར་བི་ཀྲ་མ་ཤི་ལའི་གནས་བརྟན་ཆེན་པོ་མཛད་དེ། ཆེ་བའི་སྙན་པས་ཕྱོགས་ཐམས་ཅད་དུ་ཁྱབ་པ་ལས། ལྷ་བཙུན་པ་བྱང་ཆུབ་འོད་ཀྱིས་ལན་མང་པོའི་བར་དུ་གསེར་མང་པོ་བསྐུར་བའི་སྤྱན་འདྲེན་པ་མང་དུ་བརྫངས་ཏེ། དེ་ཡང་མངའ་རིས་ཀྱི་ལྷ་བླ་མ་ཡེ་ཤེས་འོད་ཅེས་གྲགས་པ་དེའི་རྒྱལ་ཚབ་སྲོང་ངེ༌། དེའི་རྒྱལ་ཚབ་རྒྱལ་པོ་ལྷ་ལྡེ། དེའི་རྒྱལ་ཚབ་འོད་ལྡེ། དེ་ལ་གཅུང་པོ་གཉིས་ཡོད་པའི་ལྷ་བཙུན་བྱང་ཆུབ་འོད་ཆེ་བ། ཆུང་བ་དགེ་སློང་ཞི་བའི་འོད་ཅེས་བྱ་བ་སྟན་པ་ཕྱི་ནང་གི་ཆོས་མཐའ་དག་ལ་མཁས་ཤིང་ལོ་ཙཱ་ཡང་ཤིན་ཏུ་མཁས་པར་མཁྱེན་པ་ཞིག་བཞུགས། ལྷ་བླ་མ་ཡེ་ཤེས་འོད་ཀྱིས་རང་གི་རྒྱལ་སྲིད་གཏད་ཟིན་ཀྱང༌