[A:301]བཙལ་བར་བཞེད་པ་ལ། སྔར་སྤྱན་དྲངས་པའི་པནྚི་ཏ་རྣམས་ཀྱང་སྒོ་སྒོར་ཁྱད་པར་དུ་འཕགས་མོད་ཀྱི། བོད་ཁམས་སྤྱི་ལ་ཕན་པ་མ་བྱུང་བས། ཇོ་བོ་རྗེ་དེ་སྤྱན་འདྲོངས་ན། ལོག་པ་དེ་རྣམས་སུན་དབྱུང་བར་ནུས་ཤིང༌། བསྟན་པ་ལ་ཕན་པ་ཞིག་འོང་བར་དགོངས་ནས་ཡོད་པ་ལ། ནག་ཚོ་ཚུལ་ཁྲིམས་རྒྱལ་བ་ཞེས་བྱ་བ། ཡུལ་གུང་ཐང་པ། རྟེན་དགེ་སློང་དུ་བཞུགས་པ་ཞིག་ཡོད་པ་དེ། ཁོངས་རང་གིས་རྒྱ་གར་དུ་སློབ་གཉེར་ལ་ཕྱིན། རྒྱ་བརྩོན་འགྲུས་སེང་གེས་མགོ་གཉེར་མཛད་དེ། ཇོ་བོ་ལ་སོགས་པའི་པནྚི་ཏ་འགའ་ཡར་ལ་ཆོས་མང་དུ་གསན། སླར་གུང་ཐང་དུ་སླེབས་པ་ན། ལྷ་བཙུན་པས་ཁོང་རང་གི་སར་བོས་ནས། ཁྱེད་ཀྱིས་ཇོ་བོ་རྗེ་སྤྱན་འདྲེན་དུ་འགྲོ་དགོས། དེ་སྤྱན་འདྲོངས་ཏེ་ཁོ་བོ་དགའ་བར་བགྱིས་ན། ཕྱིས་ཁྱེད་དགའ་བར་ཁོ་བོས་བྱེད་པ་ཡིན། ངེད་རྒྱལ་པོ་བྱ་བའི་བཀའ་ཡང་བཅག་ཏུ་མི་བཏུབ་གསུངས་པས། ཁོང་གིས་བཀའ་སྩལ་དང་དུ་བླངས། ཁོང་གིས་ཀྱང་གསེར་ལིང་བ་གཅིག་ལ་ཤིང་སྲང་བཅུ་དྲུག་ཡོད་པས་མགོ་དྲངས་གསེར་ཚན་ཆེ་བ་བསྐུར། དཔོན་གཡོག་མང་རབ་རྒྱ་གར་དུ་ཆས་པ་ན། ལམ་དུ་ཆོམ་རྐུན་གྱི་འཇིགས་པ་བྱུང་བ་རྣམས་ཀྱང་ཐབས་མཁས་པས་ཞི་བར་བྱས་ཏེ། བི་ཀྲ་མ་ཤཱི་ལར་མཚན་མོ་ཞིག་བརྟོལ། དེར་བོད་ཀྱི་སྐད་དུ་ཁ་ཐོན་བྱས་པ་ན། རྒྱ་བརྩོན་འགྲུས་སེང་གེ་སྒོ་ཁང་སྟེང་ན་བཞུགས་པས་གསན། ཁྱེད་རྣམས་བོད་ཡིན་ནམ། སང་ངེས་པར་འཕྲད་དོ་གསུང་བའི་སྐད་ཆེན་པོ་བཏང༌། སང་དེ་རྒྱ་བརྩོན་སེང་གེས་ནག་ཚོ་ཇོ་བོའི་སྤྱན་སྔར་