[A:307]རྣམས་ཀྱིས་མགོ་བོ་ཁོས་བྱ་བ་དང༌། ནང་མ་ལ། སྒོ་འདིའི་ནང་དུ་ཐ་མལ་གྱི་རྣམ་རྟོག་སྐ་ཅིག་མ་གཅིག་སྐྱེས་ན། བསྟན་བསྲུངས་རྣམས་ཀྱིས་མགོ་བོ་ཁོས་བྱ་བ་རྣམས་བྲིས་ནས། ཇོ་བོ་ཐེགས་རྗེས་ལོ་བཅུའི་བར་སྒྲུབ་པ་རྩེ་གཅིག་ཏུ་མཛད། དཔལ་བདེ་མཆོག་གི་དཀྱིལ་འཁོར་ཡང་མངོན་སུམ་དུ་གྱུར། དགུང་ལོ་དགུ་བཅུ་རྩ་བདུན་པ་ལ་གཤེགས་ནས། སྤུར་སྦྱངས་པའི་ཚེ་གྲོང་བར་གྱི་བྱིས་པ་ཡན་ཆད་ཀྱིས་མཐོང་བར། ནམ་མཁའ་ལ་ལྷ་མང་པོས་མཆོད་པ་དང་རིམ་འགྲོ་བྱེད་པ་བྱུང༌། ཞུགས་ཕུལ་བའི་མཐར་གདུང་ལ་སོགས་པ་ནི་ཅི་ཡང་མ་བྱུང༌། རིང་བསྲེལ་དམར་པོ་འོལ་མ་སེ་ལྟ་བུ་གསུམ་པ་ཞིག་བྱུང་བ་ཡང༌། ཡུན་མི་རིང་བ་ཞིག་ན་འབྲུག་གི་སྒྲ་དང་བཅས་ཏེ་ནམ་མཁར་སོང་ཞེས་གྲགས། ལྷ་བཙུན་པས། ཁོ་བོ་རྒྱུད་གསང་བ་འདུས་པ་ལ་མོས། ལྷ་སྤྱན་རས་གཟིགས་ལ་མོས་ལགས་ན། ཞེས་ཞུས་པས། ཡེ་ཤེས་ཞབས་ལུགས་ཀྱི་གསང་བ་འདུས་པའི་དཀྱིལ་འཁོར་གྱི་གཙོ་བོ་འཇིག་རྟེན་དབང་ཕྱུག་གིས་མཛད་པའི་མངོན་པར་རྟོགས་པ། སྔགས་སུ་ཡི་གེ་གསུམ་དང་སྤེལ་བའི་མ་ཎི་པདྨེ་འདྲེན་པ་དེ་དང༌། དཀྱིལ་འཁོར་གྱི་བསྟོད་པ་ཞིག་མཛད། དཀྱིལ་འཁོར་དེ་ལ་བརྟེན་བའི་འདུས་པའི་དབང་བསྐུར་བཞི་བརྒྱ་ལྔ་བཅུ་པ་དང་མཐུན་པར་སྣང་སྟེ། ལུགས་དེ་ནི་མཁས་པ་ཐམས་ཅད་ལ་གྲགས་པར་གྱུར་ཏོ། །དེ་ལྟར་མངའ་རིས་ཀྱི་དགེ་བའི་བཤེས་གཉེན་དང༌། སྐྱེ་བོ་ཕྲ་མོ་རྣམས་ཀྱང་ལེགས་པའི་ལམ་དུ་བཅུག་སྟེ། ལོ་གསུམ་གྱི་བར་དུ་བཞུགས། ཇོ་བོའི་ལུགས་ལ་བརྟེན་པའི་