[A:310]རེ། ཁམས་ན་འབྲོམ་དགེ་བསྙེན་ཆོས་མཁན་ཅིག་ཡོད་ཟེར་བ་ཐོས། ཁྱོད་དེ་མིན་ནམ་ཟེར་བ་ལ། དེ་ཡིན་པ་སྲིད་གསུངས་པས། ཁོ་ཧ་ལས་ཏེ་ཁོ་རང་གི་འོག་གི་སྟན་ཕྱུང་ནས། དེ་ལ་བཞུགས་སུ་གསོལ། རྟ་བཟང་པོ་ཅིག་གི་ཐུར་དང་ཡུག་ལ་བྱས་ནས་ཕུལ། ད་ཅི་ནས་ཕྱག་བླངས་པ་ལ་བཟོད་གསོལ་བྱས། ངས་ཡོན་བདག་བྱེད་པས་ར་སྒྲེང་གི་ས་འདིར་དགོན་པ་མཛད་ནས་མཆོད་གནས་མཛད་པར་ཞུས་པ་ལ། ད་ལྟ་དེའི་ལོང་མེད། ང་མངའ་རིས་སུ་པནྚི་ཏ་ཞིག་མཇལ་དུ་འགྲོ་བ་ཡིན་པས། ཕྱིས་རྟེན་འབྲེལ་འགྲིག་ན་མཆོད་གནས་བྱ་ཞིང༌། ར་སྒྲེང་དུ་དགོན་པ་མཛད་པར་ཡང་ཞལ་གྱིས་བཞེས། དེ་ནས་འཕན་ཡུལ་དུ་བྱོན། རྒྱལ་གྱི་ཞང་ཆེན་པོ་དེ་དགེ་བསྙེན་གྱི་བསླབ་པ་འབོགས་མཁན་ཡིན་པས་ཕྱག་སྐྱེལ་དུ་བྱོན། ཀ་བ་ཤཱཀྱ་དབང་ཕྱུག་དང་ཡང་མཇལ་ནས་ཁོ་བོ་ད་ལན་པནྚི་ཏ་མཇལ་དུ་འགྲོ། དེ་དབུས་སུ་སྤྱན་འདྲོངས་པ་སྲིད་ན་དེའི་དུས་སུ་ཡི་གེ་གཏོང་བས། ཁྱེད་ཀྱིས་མི་ཆེན་རྣམས་ཀྱི་འདུན་མ་མཛད་དེ་བསུ་བ་ལ་འོང་དགོས་ཞུས་པས། ཁོང་གིས་ཀྱང་ཁས་བླངས། དེ་ནས་མི་གྲོང་མ་བརྒྱུད་པར་བྱང་ལམ་ལ་ཐེགས་པས། དང་པོར་མི་ངོ་མི་ཤེས་པ་ཞིག་གིས་ལམ་སྣ་བྱས། ལམ་ཁ་ཞིག་ཏུ་ཁོ་ན་རེ། ད་སྣ་ཤུད་ཀྱི་འཁྲུག་པ་ལངས་པས་ང་འགྲོ་ཟེར་ནས་ཚུབ་མར་རིངས་ཀྱིས་སོང༌། དུས་ཕྱིས་ཀྱང་འབྲོམ་གྱི་ཞལ་ནས། དེ་དཔེ་དཀར་དུ་འདུག ཆོས་གཤའ་མར་བྱེད་ན་ཁོང་ཡང་ཆོས་སྐྱོང་བཟང་པོར་འདུག་གསུང༌། ཡང་ལམ་མ་རྙེད་པ་ལ་ཤ་བ་གཅིག་སོང་བའི་རྗེས་ལ་བྱོན་པས་