[A:320]དགུ་བསྟེན། གདམས་པའང་ཕལ་ཆེར་ཐོབ། གྲུབ་ཐོབ་འཁོན་ཕུ་བའི་གསུང་ལ་ནི། ཁོང་རང་དང་ནག་ཚོ་སྐྱེ་བ་སྔ་ཕྱི་ཡིན་ཟེར། ནག་ཚོས་ནི། ཕྱིས་ཀྱང་ཛྙཱ་ན་ཨཱ་ཀ་ར། བལ་པོ་ཤཱནྟི་བྷ་དྲ། ནག་པོ་དམ་ཚིག་རྡོ་རྗེ་ལ་སོགས་པ་ལ་བསྟེན་ནས་འགྱུར་ཡང་མང་དུ་མཛད་དོ། །ཇོ་བོའི་ཐུན་མོང་མ་ཡིན་པའི་སློབ་མ་ལྔ་ནི། པནྚི་ཏ་ཆེན་པོ་པི་ཏོ་བ། དྷརྨཱ་ཀ་ར་མ་ཏི་དབུ་མའི་སེང་གེ བཤེས་གཉེན་གསང་བ། ཛྙཱ་ན་མ་ཏི། པནྚི་ཏ་སའི་སྙིང་པོའོ། །བོད་ཀྱི་སློབ་མ་ལ། ལྷ་བཙུན་པ་བྱང་ཆུབ་འོད་ཁུ་དབོན། ལོ་ཆེན་རིན་ཆེན་བཟང་པོ། གུ་མི་སྒོམ་ཆེན། ནག་ཚོ་ཚུལ་ཁྲིམས་རྒྱལ་བ། གློ་བོ་ནས་སྟོན་པ་ཡང་རབ། གུང་ཐང་སྒོམ་པ་ཚུལ་ཁྲིམས། ཤེས་རབ་འབྱུང་གནས། ལྷོ་བྲག་པ་ཆག་ཁྲི་མཆོག བཙུན་པ་དགེ་སྐྱོང༌། རྒྱ་བརྩོན་སེང༌། དགེ་བའི་བློ་གྲོས། ཚུལ་ཁྲིམས་འབྱུང་གནས། ལྷ་ཆེན་པོ། གཟུས་རྡོ་རྗེ་རྒྱལ་མཚན། གཙང་སྟོ་ནས་བྲ་སྟོན་ཆེ་ཆུང་གཉིས། ལེང་འབྲོག་གཉིས། གཙང་སྨད་ནས་རོང་པ་འགར་དགེ་བ། འགོས་ལོ་ཙཱ་བ། ཡོལ་ཆོས་དབང་མཆེད་གསུམ། གནམ་གྱི་རྫིང་ཁ་བ། བང་སྟོན། རྔོག སུམ་པ། སྣ་ནམ། མྱང་མི། མལ་ཤེས་རབ་སེམས་དཔའ། དཔོན་ཆོས་རྒྱལ། འགོས་སྟོང་བཙན། ལྷབ་མི་ཆེན་པོ། སྒྲོ་ཨཱརྻ་བྱང་ཚུལ། ཁུ་མདོ་སེང་གེ་རྒྱལ་མཚན། ལྷ་རྗེ་བསམ་གཏན། ཞང་བཙུན་ཡར་པ་བ། སྒོམ་པ་དད་པ་བླ་མ། ཞང་བཙུན་དྲི་མ་མེད་པ། སུམ་པ་མཐུ་ཆེན། ཁུ་སྟོན།