[A:31]བུ་མེད་པར་ཤི་ནས། རྐང་གདུབ་ཅན་རྒྱལ་པོར་གྱུར་ཏེ། དེའི་བུ་གནས་འཇོག དེའི་བུ་ས་ཁྱིམ་ནས་བརྒྱུད་པ་རྒྱལ་པོ་ལྔ་ཁྲི་ལྔ་སྟོང་སེར་སྐྱར་བྱུང་ངོ༌། དེའི་ཐ་མ་རྒྱལ་པོ་ཤིང་རྟ་བཅུ་པ་སོགས་མིང་སྨོས་པ་བཅུ་གཉིས་བྱུང་བའི་ཐ་མ་གཞུ་བརྟན། དེ་ལ་བུ་སེང་གེའི་འགྲམ་དང་སེང་གེ་སྒྲ་གཉིས་ཏེ་སེང་གེའི་འགྲམ་ནི་འཛམ་བུའི་གླིང་ན་གཞུ་ཐོགས་རྣམས་ཀྱི་མཆོག་གོ །དེ་ལ་བུ་བཞི་སྟེ། ཟས་གཙང་དང༌། ཟས་དཀར་དང༌། བྲེའོ་ཟས་དང༌། བདུད་རྩི་ཟས་སོ། །བུ་མོ་གཙང་མ་དང༌། དཀར་མོ་དང༌། བྲེའོ་མ་དང༌། བདུད་རྩི་མའོ། །ཟས་གཙང་ལ་བུ་བཅོམ་ལྡན་འདས། ཅུང་དགའ་བོ། ཟས་དཀར་ལ་རྒྱལ་བ་དང༌། རྒྱལ་པོ་བཟང་ལྡན་ནོ། །བྲེའོ་ཟས་ལ་མིང་ཆེན་དང༌། མ་འགགས་པའོ། །བདུད་རྩི་ཟས་ལ་ཀུན་དགའ་བོ་དང་ལྷ་སྦྱིན་ནོ། །གཙང་མའི་བུ་ལེགས་པར་རབ་སད་དོ། །དཀར་མོའི་བུ་ཕྲེང་བ་ཅན། བྲེའོ་མའི་བུ་བཟང་ལེན། བདུད་རྩི་མའི་བུ་དགེ་འཕེལ་ལོ། །བཅོམ་ལྡན་འདས་ཀྱི་སྲས་སྒྲ་གཅན་ཟིན་ཏེ། དེས་མང་པོས་བཀུར་བའི་བརྒྱུད་རྫོགས། དེ་ལ་ཟས་གཙང་ཡན་དུ་ས་ཡ་ཆིག་འབུམ་ཉི་ཁྲི་ཆིག་སྟོང་ལྔ་བརྒྱ་བཅུ་བཞི་རྣམས་བྱུང་ངོ༌། །
འཇིག་རྟེན་གདགས་པར་ནི། །མང་པོས་བཀུར་བ། དེའི་བུ་འོད་མཛེས། དེའི་བུ་དགེ་བ། དེའི་བུ་དགེ་མཆོག དེའི་བུ་གསོ་སྦྱོང་འཕགས། དེའི་བུ་སྤྱི་བོ་སྐྱེད། འདིས་གླིང་བཞི་ལ་དབང་བསྒྱུར་དེའི་བུ་མཛེས་པས་གླིང་གསུམ། དེའི་བུ་ཉེ་མཛེས་ཀྱིས་གླིང་གཉིས།