[A:337]དགེ་རྩ་བྱས། ད་ནི་ཤི་ཡང་མི་འགྱོད་དོ། །ལྷ་རུ་ཉེ་དུ་མ་མཆོད་ཅིང༌། ཧྲུལ་པོའི་གོས་བྱོན་དམན་ས་གཟུང༌། སུ་དང་འགྲོགས་ཀྱང་ཡིད་མ་ཕྱུང༌། །གྲགས་པ་མ་བསྒྲུབས་ནོར་མ་བསགས། ད་ནི་ཤི་ཡང་མི་འགྱོད་དོ། །མི་ཆོས་ལྷ་ཆོས་རིས་སྲིད་དང༌། ཡོན་བདག་ལྷ་བཞིན་མཆོད་པ་དང༌། བན་མོའི་བསྙེན་བཀུར་རྣམས་སྤངས་ཏེ། དྲང་སྲོང་ཆེན་པོའི་རྣམ་ཐར་སྤྱད། །ད་ནི་ཤི་ཡང་མི་འགྱོད་དོ། །བྱད་བཞིན་ཅན་དང་ནོར་ཅན་ལ། ཚོགས་སོགས་བསྙེན་བཀུར་མ་བྱས་ཤིང༌། བུན་སྐྱེད་མ་བྱས་ཚོང་མ་བྱས། མཁར་ལས་མ་བྱས་གཞི་མ་གཟུང༌། ད་ནི་ཤི་ཡང་མི་འགྱོད་དོ། །ཞེས་པ་ལ་སོགས་པ་གསུངས་ནས་གཤེགས་སོ། །དེ་ལ་བྱ་འཆད་ཁ་བ་འདི་ཤར་པ་བའི་སོ་གཉིས་པ་ལྕགས་མོ་སྦྲུལ་ལ་འཁྲུངས་ནས། རང་ལོ་སུམ་ཅུ་པ། ཤར་པ་བའི་དྲུག་ཅུ་རྩ་གཅིག་པ་ལྕགས་ཕོ་ཁྱི་ལ་མཇལ་ནས། ལྕགས་མོ་བྱའི་བར་ལོ་བཅུ་གཉིས་སུ་འགྲོགས། དེ་རྟིང་ལོ་སུམ་ཅུ་རྩ་བཞི་བཞུགས་ཏེ། རང་ལོ་དོན་ལྔ་པ་ཤིང་མོ་ལུག་ལ་མྱ་ངན་ལས་འདས། དེའི་རྗེས་སུ་སེ་སྤྱིལ་བུ་བ་ནི། གདུང་རུས་སེ། གཉལ་སྟོད་དར་མ་སྒང་དུ་ལྕགས་གླང་ལ་འཁྲུངས། མཚན་ཆོས་ཀྱི་རྒྱལ་མཚན། འཆད་ཁ་བ་ལ་ལོ་མང་དུ་བསྟེན་ནས། ཤིང་སྤྲེ་ལ་འཆད་ཁ་གསར་མ་བཏབ། སྤྱིལ་བུར་ཡང་དགོན་པ་མཛད། འཆད་ཁ་བ་གཤེགས་རྗེས་མེ་སྤྲེ་ནས་ལྕགས་བྱའི་བར་དགོན་པ་ཕན་ཚུན་དུ་ལོ་བཅུ་བཞི་བཞུགས། འདིའི་སློབ་མ་རྣལ་འབྱོར་བྱང་སེང༌། རྒྱ་སྤང་ས་ཐང་པ། ལྷ་དགེ་འདུན་སྒང་པ། ཉན་ལྷ་སྡིངས་པ་རྣམས་ཀྱིས་