[A:351]ཁྱོད་ཀྱི་ཤེས་རབ་འདི་ལྷ་ས་སྙེ་ཐང་བའི་གྲྭ་པ་བྱེད་ཐང་བ་ལ་གསུང༌། ཡང་། ཁྱོད་ནི་ཐར་ཟིན་གྱི་དམ་བཞག་ཅིག་གསུང་སྐད། ཡང་སྟོད་ལུངས་པས་ལན་ཅིག་སྤྱན་སྔ་མཇལ་དུ་བྱོན་ནས། བཙུན་ཆུང་འདི་ཅི་འདྲ་ཞུས་པས། སྒོར་སོང་ནས་བྱ་གསུང་ཞིང༌། ཁོང་སྒོར་སོང་བ་དང༌། འདི་དད་པ་དང་ཤེས་རབ་ངང་གིས་ཆེ། ནམ་མཁའ་ལ་མདུང་བསྐོར་གསུང་ལོ། ཆོས་གསུང་བ་ཐམས་ཅད་ཀྱི་རྩར་འཇོག །ཉན་པའི་དགོན་པར་མང་ར་དང་བྱ་ཡུལ་བ་གཉིས་ལ་དབང་སྟབས་གཅིག་ཏུ་མཛད། མང་ར་དེ་ཕུ་ཆུང་བའི་སར་ཡོང་དུས། ད་ལྟ་ཉན་ཐོས་ཀྱི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་དཔའ་གཅིག་སྨིན་བདོ་གསུང་སྐད། སྤྱན་སྔ་མྱ་ངན་ལས་འདའ་ཁར། བྱ་ཡུལ་བས། དགེ་བའི་བཤེས་གཉེན་ལགས། མ་འོངས་པ་ན་ཐུགས་ལ་གདགས་པར་ཞུ་བྱས་པས། ཇི་སྲིད་ཆོས་ཀྱི་སྐུ་གཅིག་ཏུ་མ་གྱུར་གྱི་བར་དུ་མི་འབྲལ་ལོ་གསུང༌། གཞན་གྱི་བསམ་པ་ལ། སྤྱན་སྔའི་ཞབས་ཏོག་ཁོ་ན་ལ་འཁོལ་བ་ལ་ཆོས་མི་འོང་བསམ་པ་ཡོད་མོད་ཡི། ནང་ཞིག་ཐལ་བ་འབོད་དུ་བྱོན་པས། སྐད་གདང་གསུམ་པའི་ཁར་ཕེབས་པའི་ཚེ། བཀའ་སྡེ་སྣོད་ཀྱི་དོན་མ་ལུས་པ་ཐུགས་ལ་ལམ་གྱིས་བྱུང་བས། བླ་མའི་ཞབས་ཏོག་ལ་ཡིད་ཆེས་ཏེ། སྐྱི་སྨད་པའི་དགེ་བའི་བཤེས་གཉེན་འདི་རྣམས་བླ་མའི་ཞབས་ཏོག་ལ་མི་འབད་པར་ཐོས་པ་ཁོ་ན་འབད་པ་འདི་ནོར་བ་ཡིན་བྱ་བ་ཡང་གསུང་སྐད། སྤྱན་སྔ་གཤེགས་རྟིང་ཕུ་ཆུང་བ་དང་པོ་ཏོ་བའི་སར་འབུལ་བ་བཟང་པོ་རེ་ཡང་བསྐྱལ། པོ་ཏོ་བས་ངའི་འདིར་སྡོད་ཁང་པ་