[A:357]ཚེ་འདི་ཉིད་རང་ལ་བྱ་བ་བྱས་ཏེ་འོང་གསུང་བ་ལ། གླང་ལུང་པས་སློབ་དཔོན་པའི་མཁྱེན་པ་དང་ཐུགས་དམ་འདི་ལས་འཕུལ་ས་བྱེད་ན། སློབ་དཔོན་བྷ་བྱ་ལྟར་ཚེ་འདི་ཉིད་ལ་རིག་འཛིན་གྱི་གནས་སུ་གཤེགས་པ་ཞིག་བཞེད་པ་ལགས་སམ་ཞུས་པས། དེ་ཡིན་གསུང༌། དེ་དུས་སྔགས་པ་འདྲ་བ་ལ་དབང་ཞུས་པས་སྨིག་རྒྱུ་ལྟ་བུའི་སྣང་བ་དེ་ཡལ་ནས་སོང༌། དེ་བར་ཆད་དུ་འདུག་པ་ལ་བྱིན་རླབས་ཀྱིས་བར་ཆད་བསལ་བ་ཡིན་སྙམ་པ་བྱུང༌། དེ་ནས་སྔགས་མཚན་ཉིད་ཀྱི་ཐོས་པ་ལ་འདི་མ་མཛད་བྱ་བ་མེད། བླ་མ་ལ། ལོ་ཙཱ་བ་རང་ཡང་རྔོག་ལོ། གཉན་ལོ། བ་རི་ལོ། ཙཱ། རྭ་ལོ། བཙན་ཁ་བོ་ཆེ་སྟེ་ལྔ་ཙམ་ལ་གཏུགས། བཙན་ཁ་བོ་ཆེ་ལ་མདོ་སྡེ་རྒྱན་གསན་པས་ཚར་གཅིག་ལ་མཁྱེན། མ་ཧཱ་མ་ཡཱའི་དཔེ་གཟིགས་པས་ཚིག་དོན་གཞན་ཐམས་ཅད་ཐུགས་སུ་བྱུང་བ་ལ། ཤོ་ལོ་ཀ་གཅིག་ལ་འདི་ཅི་ཟེར་སྙམ་པ་བྱུང་བས། ཕྱིས་གཉལ་ཆུང་བ་བྱ་བ་ལ་གསན་པས། གཞན་རྣམས་འདྲ་བ་ལ། ཚིགས་བཅད་གཅིག་པོ་དེ་རྒྱ་དཔེ་ལ་མེད་གསུང་ནས་བཤད་པ་མ་བྱུང༌། དེ་ཉིད་བསྡུས་པའི་སྟོད་འགྲེལ་ལ་གཟིགས་རྟོག་མཛད་པས། དེའི་བརྗོད་བྱ་ཟབ་མོ་ལ་དད་པས་ཞག་འགའ་ཡར་དུ་ནམ་མཁའ་རྣམ་པར་དག་པ་ལྟ་བུའི་སྣང་བ་མ་བསྒོམས་པར་བྱུང༌། ནམ་མཁའ་ལས། ཆོས་ཉིད་འོད་གསལ་རྟོགས་པ་ལས། ཆོས་རྣམས་མ་ལུས་ཤེས་པར་འགྱུར། ཟེར་བའི་སྒྲ་ཞིག་བྱུང༌། དེ་ཙ་ན་རོ་སྟོད་རྒྱངས་ཀྱི་བསྙུང་བ་ལ། མི་དཀར་པོ་རལ་པའི་ཐོར་ཅོག་ཅན་ཞིག་གིས་རིལ་བ་སྤྱི་བླུགས་ནས་བདུད་རྩི་བླུགས་ནས་ཐམས་ཅད་གང་བའི་