[A:362]འདུལ་བ་མཉན་པས་གོ་བ་ཡེ་མ་བྱུང་བས། ཕྱིས་གཞན་ལ་མཉན་པས་ཚེགས་མེད་པར་མཁྱེན། ཉག་མོ་བའི་ཐད་དུ་ལོ་བདུན་བཞུགས་ནས་ལམ་རིམ་ཞུས་པ་ལ། ཆོས་མ་རྫོགས་པ་ལ་དགེ་བའི་བཤེས་གཉེན་པ་གཤེགས། ཕྱིས་རྨི་ལམ་དུ་མཇལ་བས། ཉག་མོ་བའི་ཞལ་ནས། ངས་ཁྱོད་བདེ་བ་ཅན་དུ་བསྐྱལ་ཅིག་གསུང་ནས་ནམ་མཁའ་ལ་འཕགས་པའི་ཚེ་མནལ་སད། དགུང་ལོ་ཉི་ཤུ་རྩ་ལྔ་པ་ལ་མར་སྣོན་གྱི་གྱང་བར་བྱ་འདུལ་གྱིས་མཁན་པོ་དང༌། ཕྱྭ་པས་སློབ་དཔོན་དང༌། སྟོན་པ་ཆོས་མཆོག་གིས་གསང་སྟེ་མཛད་ནས་བསྙེན་པར་རྫོགས། ཉག་མོ་པ་དང་བྱ་ཡུལ་བའི་སློབ་མ་དགེ་བཤེས་བཀྲ་ཤིས་སྒང་པ་ལོ་བརྒྱད་བསྟེན། མནལ་ལམ་དུ་ཁོང་ལ་བྱིན་རླབས་ཞུས་པས། ཤ་དམར་མོར་ཅིག་གནང་བ་གསོལ་བས་རང་བཞིན་མེད་པའི་ཏིང་ངེ་འཛིན་གྱི་ངང་དུ་ཆམ་གྱིས་སོང༌། ཡང་མནལ་ལམ་དུ་ཡོལ་བ་ཅིག་འདུག་པ་བསལ་ནས་སྤྱན་སྔར་བྱོན་པས། སྐུ་མདུན་དུ་བུམ་པ་གཅིག་ཀྱང་འདུག་པ་དབང་བསྐུར་ཅིག་ཞུ་བྱས་པས། དབང་བསྐུར་གནང་བས་ཀྱང་རང་བཞིན་མེད་པའི་ཏིང་ངེ་འཛིན་གྱི་ངང་དུ་སོང༌། ལན་ཅིག་རྩ་ལྟུང་རྒྱ་ཆེར་འགྲེལ་གཟིགས་པས། དེ་ལ་དད་པའི་སྟོབས་ཀྱིས་ཞག་དྲུག་དྲུག་ཙམ་རང་ལུས་དཀྱིལ་འཁོར་གྱི་འཁོར་ལོར་གཟིགས་པ་བྱུང༌། སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པ་གཟིགས་པས་ཀྱང༌། སྣང་བ་འདི་ཐམས་ཅད་འཇའ་ཚོན་ལྟ་བུར་གཟིགས། ཡང་ཞག་ལྔ་དྲུག་རེ་ཙམ་གྱི་བར་དུ་སྤྱོད་ལམ་ཐམས་ཅད་དུ་ཕྱི་ནང་གི་སྣང་བ་ཐམས་ཅད་འགགས་ཏེ་ནམ་མཁའ་ལྟ་བུར་སོང་ནས།