[A:370]
བྱ་ཡུལ་བའི་སློབ་མའི་སྐབས།
མལ་གྲོར་བུལ་བ་པ་ཆེན་པོས་རྒྱལ་པོ་སྟེངས་བཏབ། སྨད་ཀྱི་དུམ་བུ་རི་བ་ཆེན་པོས་དུམ་བུ་རི་བཏབ། འདི་ལ་སྨད་ཀྱི་བྱང་སེམས་ཟླ་རྒྱལ་དུ་གྲགས། ཤབ་པ་གླིང་པ་ཆེན་པོས་དྭགས་པོར་ཤབ་པ་གླིང་བཏབ། ཁྲོམ་བཞེར་ཆེན་པོས་ཀམ་ཀམ་གྱི་གཙུག་ལག་ཁང་བཏབ་སྟེ། དེ་ཡང་ཁྲོམ་བཞེར་རིན་ཆེན་སེང་གེ་ཞེས་བྱ་བ་འཆུམས་སུ་སྔགས་བརྒྱུད་ལས་ལྕགས་ཕོ་འབྲུག་ལ་འཁྲུངས། རྟེན་སྔགས་པ་སྐྱ་བོར་བཞུགས། ལྕགས་འབྲུག་འདི་བྱ་ཡུལ་བའི་ཉེར་དྲུག་པ་ཡིན། སྣ་ནམ་ཇོ་དཔལ་དང་ལྷ་བཙུན་བྱང་ཆུབ་འོད་ཀྱི་སློབ་མ་དབྱིག་ཐང་སྟོན་པ་ཞེས་པ་མདོ་ལུང་ན་བཞུགས་པ་དང༌། ཀམ་པ། ཤར་པ་བ། བྱ་ཡུལ་བ་རྣམས་བསྟེན། རང་ལོ་སོ་བརྒྱད་པ་མེ་མོ་སྦྲུལ་ལ་ཀམ་ཀམ་བཏབ། གྲྭ་པ་དགེ་འདུན་ཉིས་བརྒྱ་ཙམ་འདུས། སོ་དགུ་བཞེས་པ་ས་ཕོ་རྟ་ལ་བྱ་ཡུལ་བ་གཤེགས། རྒྱ་མ་དབོན་སྟོན་འཁྲུངས། རང་ལོ་བདུན་ཅུ་རྩ་གཅིག་པ་ལྕགས་སྟག་ལ་གཤེགས། ལོ་དེ་ལ་དཔལ་ཕག་མོ་གྲུ་པ་ཡང་གཤེགས། དགྱེར་སྒོམ་ཆེན་པོ། སྣར་ཐང་པ་གཏུམ་སྟོན། སྤ་ཚབ་ལོ་ཙཱ་བ། སྟབས་ཀ་བ་ཆེན་པོ་རྣམས་དང་དུས་མཚུངས། དེའི་གདན་ས་པ་སྐྱོ་སྟོན་རིན་པོ་ཆེ་བྱང་ཆུབ་རིན་ཆེན་ནི། ཁྲོམ་བཞེར་གྱི་ཉེར་བདུན་པ་མེ་ཕོ་རྟའི་ལོ་ལ་གྲོག་གི་མདའི་སྐྱོ་གྲོང་དུ་འཁྲུངས། བཅུ་གསུམ་པ་ལ་