[A:374]བཅུ་གཅིག་ལ་མཁན་ཆེན་སྔ་མ་ལས་རབ་ཏུ་བྱུང༌། གྲོ་སར་མཁན་ཆེན་འོད་ཟེར་རྒྱལ་པོ་ལས་བསྙེན་པར་རྫོགས། ཆོས་འཁོར་གླིང་བའི་སློབ་དཔོན་བྱམས་པ། སྤྱན་སྔ་རིན་སང་བ་སོགས་བསྟེན། བཅོ་བརྒྱད་པ་ཆུ་མོ་ཡོས་ལ་གདན་སར་བྱོན། རང་ལོ་ཉེར་བཞི་བ་ས་མོ་བྱ་ལ་གཤེགས། འདི་གཤེགས་ནས་ཕྱི་མ་མ་བསྐོས་པའི་བར་དུ་ལོ་སུམ་ཅུ་རྩ་དགུ་འདུག་གོ མཁན་ཆེན་བརྩོན་འགྲུས་བཟང་བོ་ནི། ཆུ་མོ་གླང་ལ་ཀླུངས་ཤོད་ཟུར་རེར་འཁྲུངས། ལོ་བཅུ་ལ་འཇམ་དབྱངས་རིན་ཆེན་སེང་གེའི་ཞབས་ལ་གཏུགས་ནས་མཁན་པོ་ཞུས། སློབ་དཔོན་མཁན་ཆེན་བརྩོན་རིན་པ་ལ་ཞུས་ནས་རབ་ཏུ་བྱུང༌། ལོ་ཉེར་བདུན་པ་ལ་སྔར་གྱི་མཁན་སློབ་ལས་བསྙེན་པར་རྫོགས། ཆོས་འཁོར་གླིང་དུ་སློབ་དཔོན་ཤེས་རབ་རྒྱལ་མཚན་དང་སློབ་དཔོན་བློ་བཟང་པ་བསྟེན། མཁས་ཆེན་བཀྲས་རིན་པ། ཆོས་རྗེ་བླ་མ་དམ་པ་བསོད་ནམས་རྒྱལ་མཚན། མཁན་ཆེན་ཆོས་དབང་པ། སྤྱན་སྔ་རིན་སེང་བ། བྱ་ཡུལ་བའི་མཁན་པོ་རིན་ཚུལ། སློབ་དཔོན་གཞོན་བརྩོན། སློབ་དཔོན་རིན་གྲུབ། མཁན་པོ་བརྩོན་རྒྱལ་རྣམས་བསྟེན། ལོ་སོ་བདུན་པ་ས་མོ་གླང་ལ་གདན་སར་བྱོན། ལོ་ཉེར་བདུན་བཞེས་པ་ལ་ཀར་མ་པ་རང་བྱུང་རྡོ་རྗེ་གཤེགས། སོ་དགུ་པ་ལྕགས་ཡོས་ལ་འབྲི་ཁུང་པའི་སྤྱན་སྔ་ཉེར་བརྒྱད་པ་གཤེགས། ཞེ་དགུ་པ་ལྕགས་གླང་ལ་ཀུན་མཁྱེན་ཇོ་ནང་བ་གཤེགས། དེ་རྗེས་ཀྱི་ཆུ་ཡོས་ལ་རྫོགས་ཆེན་པ་ཚུལ་བློ་གཤེགས། དེའི་ཕྱི་ལོ་ཤིང་འབྲུག་ལ་བུ་སྟོན་པ་གཤེགས། དེ་རྗེས་ཀྱི་མེ་རྟ་ལ་རྟོགས་