[A:378]ཇི་ལྟ་བ་བཞིན་དུ་གནང་བར་འདུག་སྙམ་པ་བྱུང་བ་བཞིན། གདམས་པ་སྣ་ཚང་བར་ཐུགས་ལ་བཏགས། རེས་འགའ་ཕྱག་བཙལ་ནས། ང་ལ་ཞབས་ཀྱིས་བྱིན་རླབས་གནང་བྱུང་བསམ་པ་ན། བླ་མས་ཞབས་ནར་གྱིས་བརྐྱང་ནས་འོང༌། ལན་ཅིག་ཕྱག་སོར་གསུམ་གྱིས་མགོ་ལ་བྱིན་རླབས་མཛད་པས། དབུ་ལ་ཕྱག་སོར་གསུམ་པོ་ཐིམ་པའི་ཤུལ་སྐྱོང་ལོག་གེ་བ་ཇི་སྲིད་འཚོའི་བར་དུ་ཡོད། ཡི་དམ་དུ་རྗེ་བཙུན་མི་གཡོ་བ་གནང་ནས་དེའི་བསྙེན་པ་མང་དུ་མཛད་པས་ཞལ་ཡང་ལེགས་པར་གཟིགས། དགོན་པ་བ་གཤེགས་ནས་པོ་ཏོ་བ་ལ་བསྟེན། གཞན་གྱིས་ཕྲག་དོན་བྱས་ནས་འདི་ལ་ནག་སྐྱོན་ཡོད་ཅེས་བྱས་ཏེ། པོ་ཏོ་བ་ཐུགས་ལོག་པ་ལ། ང་ལ་འདིའི་སྐྱོན་ཡེ་མེད་པ་ཞིག་ཡིན་ཞུས་ཀྱང༌། དེ་ཁྱོད་རང་ཁོ་ན་ལ་དགའ་ཅིག་གསུང་ནས་བཀྱོན་དུ་བྱུང་བ་ལ། ངའི་བླ་མ་དེ་བཞུགས་ན་མངོན་པར་མཁྱེན་པ་ཆེན་པོ་མངའ་བས་འདི་འདྲ་བ་མི་འོང་སྟེ་སྙམ་པའི་ཡི་མུག་པ་ཡང་བྱུང་གསུང༌། ཕྱིས་ནི་སྐྱོན་མེད་པར་དགོངས་ཏེ། པོ་ཏོ་བ་ལེགས་པར་དགྱེས་ནས་པོ་ཏོ་བ་གྲྭ་པ་མང་པོ་སྐྱོང་ཞིང་སྟག་ལུང་དུ་བཞུགས་པའི་ཚེ། དགེ་སློང་བཅུ་ལྷག་ཙམ་ལ་ཀླུའི་ནད་བྱུང་བ་ཡང་ཁྱོད་ཀྱིས་གསོས་གསུང་ནས། སྣེའུ་ཟུར་པས་ལེགས་པར་བཅོས། པོ་ཏོ་བ་དུས་ཕྱིས་སྐུ་ཁམས་བསྙེལ་བའི་ཚེའང༌། འཁོར་གྱིས་དགེ་བའི་བཤེས་གཉེན་འདི་དང་འདི་སྔས་བསྲུངས་སུ་གདན་དྲངས་