[A:391]དགེ་བཤེས་སྟོན་པ་ལ། དགེ་བའི་བཤེས་གཉེན་པ་ལགས། ཁྱེད་ལ་ཇོ་བོའི་གདམས་ངག་ཐམས་ཅད་བུམ་པ་གང་བྱོའི་ཚུལ་དུ་མངའ་བ་ལགས་པས། དེས་ཀྱང་མི་ཕན་དེས་ཀྱང་མི་ཕན་མི་གསུང་བར་ཇོ་བོའི་གདམས་ངག་རྣམས་མི་འཆབ་པར་གསུང་བ་ཞུ། རྣལ་འབྱོར་པ་ལ། ཁྱོད་རྣལ་འབྱོར་པ་མི་ཆོས་སུ་ངན་ཏེ་ཇོ་བོའི་གཡོག་བཞག་ནས་སྦ་རྒྱ་མཚོའི་རྗེས་ལ་ཕྱིན། ལྷ་ཆོས་སུ་ངན་ཏེ་ཇོ་བོའི་གདམས་ངག་བསྒོམ་པ་བཞག་ནས། དབས་ཆུང་སྟོན་པའི་བདག་མེད་མའི་སྒྲུབ་ཐབས་བསླབས་པ་ཡིན་བྱ་བ་ལ་སོགས་པ་རིམ་གྱིས་མང་པོ་གསུངས་པའི་རྗེས་ལ། ཁོ་བོ་ནི་དེ་རིང་ནས་ཚེ་འདིའི་རྣམ་པར་རྟོག་པ་ལ་མཚམས་གཅོད་གསུང་བས། གནས་ཁང་ཞིག་ཏུ་མཚམས་སྡོམ་པ་ཡིན་སྙམ་ཙ་ན། མཚམས་ཀྱང་མི་མཛད། མི་དང་གླེང་མོ་ཙམ་ཡང་མི་མཛད་པར་བཞུགས། ལན་གཅིག་གི་ཚེ་དགེ་བའི་བཤེས་གཉེན་གསང་ཕུ་བ་དེ་རྭ་སྒྲེང་དུ་བྱོན་ནས་ཁོང་དང་ཐུགས་གཅུགས་པས་གསུང་གླེངས་ཐུགས་བཅགས་པ་ཞིག་བྱ་བསམ་ནས་ཁོང་དང་མཇལ་བའི་ཚེ། ཁོང་གི་ཞལ་ནས། དགེ་བའི་བཤེས་གཉེན་པ། ཁོ་བོ་ལ་མིའི་འདི་ཡིན་མི་བདོག་པས་བཟོད་པ་མཛད་པར་ཞུ་གསུང་ནས། ནགས་ཁྲོད་ན་ཕར་ལྡོ་ལྡོ་གཤེགས། གསང་ཕུ་བའི་ཞལ་ནས། དེ་ལས་ཡི་མུག་པ་ཞིག་ནི་མ་བྱུང་གསུང་སྐད། དེར་ཁོང་གིས་ཕལ་ཆེར་མཉམ་པར་འཇོག་པ་ཁོ་ན་མཛད། ནམ་ཞིག་དགོན་པ་བའི་སྤྱིལ་པོའི་གཡོན་གྱི་ཕ་བོང་ཞིག་གི་སྟེང་ནས་མཁའ་སྤྱོད་དུ་གཤེགས་པ་ཡིན་ལོ། །ཆོས་རྒྱལ་ཁྲི་སྲོང་ལྡེ་བཙན་གྱི་བློན་པོ་རྔོག་ཆེན་པོ་བྱ་བ། བཙན་