[A:394]གསན་ཞིང་བལ་པོར་ཡུག་ཅིག་བྱོན་ནས་ཨ་ཏུ་ལྱ་བཛྲེ་དང༌། བ་རེནྡྲ་རུ་ཙི་ལ་སོགས་པ་ལ་སྔགས་ཀྱི་གསན་པ་ཡང་མཛད། སླར་བོད་དུ་ཕེབས། འགྱུར་མང་པོ་མཛད་པ་ཡང་དག་ཅིང་ཤིན་ཏུ་འགྱུར་བཟང༌། འགྱུར་མཛད་པའི་ཚད་ནི་གྲོ་ལུང་བས། དམ་ཆོས་བསྒྱུར་ལ་མངའ་བརྙེས་པས། །རྒྱལ་ཡུམ་གཉིས་དང་བསྟན་བཅོས་གཞུང༌། །འབུམ་ཕྲག་གཅིག་དང་ཁྲི་ཕྲག་གསུམ། །སྟོང་ཕྲག་བདུན་ནི་ལྷག་བཅས་བསྒྱུར། །ཞེས་འབྱུང་བ་དེའོ། །ལྷ་ས་དང༌། བསམ་ཡས་དང༌། མྱུ་གུ་སྣ་དང༌། གཉལ་སྒང་ཐོག་དང༌། གཙང་རྒྱང་མཁར་ལ་སོགས་པར་བཤད་པ་མཛད་པའི་ཚེ། མཁས་བཙུན་གྲྭ་པ་རིམ་པ་བཞིན། ཁྲི་ཚོ་གཉིས་དང་སུམ་སྟོང་དང༌། ཞེས་བྱ་བ་དང༌། ཟུར་ཆོས་པའི་གྲངས་ཀྱང༌། རྒྱན་དང་ཆོས་མཆོག་འཆད་མཁན་ལྔ་བཅུ་རྩ་ལྔ། རྣམ་ངེས་འཆད་པ་ཉིས་བརྒྱ་དང་བརྒྱད་ཅུ། ལུང་ཆོས་སྨྲ་བ་སྟོང་དང་བརྒྱད་བརྒྱ་སྟེ། ཆོས་སྨྲ་བ་ཉིས་སྟོང་དང་བརྒྱ་སུམ་ཅུ་ཙམ་ཞིག་འདུས། ཚད་མ་དང༌། བྱམས་ཆོས་དང༌། དབུ་མ་ལ་སོགས་པའི་རྣམ་པར་བཤད་པ་ཡང་མང་དུ་མཛད། ཕ་རོལ་ཏུ་ཕྱིན་པ་དྲུག་གི་སྤྱོད་པ་ཐམས་ཅད་ཡོངས་སུ་རྫོགས་པར་སྤྱོད་པའི་སེམས་དཔའ་ཆེན་པོ་དེ་ནི། དགུང་ལོ་ལྔ་ཅུ་རྩ་གཅིག་བཞེས་པའི་ཚེ་བསམ་ཡས་དང་ཉེ་བའི་སར་ལམ་དུ་སྐུ་གཤེགས། དེ་ལྟར་ཆོས་གྲྭ་སྔ་ཕྱིར་མཛད་པ་རྣམས་ལ་སློབ་མའི་ཚོགས་མཐའ་ཡས་མོད། ཞང་ཚེས་སྤོང་ཆོས་ཀྱི་བླ་མ། གྲོ་ལུང་པ་བློ་གྲོས་འབྱུང་གནས། ཁྱུང་