[A:48]བས་བྲིས་པ་ཡིན་ཏེ། ཇོ་བོ་རྗེའི་ལོ་རྒྱུས་ཀྱི་ཡི་གེ་ན། ཇོ་བོ་ནཱ་རོ་ཏ་པས་ཇོ་བོ་རྗེ་ལ་བསྟན་པ་གཏད་ནས་ལྷོ་ཕྱོགས་ལ་གཤེགས་ཞེས་བྱ་བ་ལ་སོགས་པ་མང་པོ་འབྱུང་མོད་ཀྱི། དེ་རྣམས་ནི་བྲིར་མི་ལང་ངོ༌། །དེ་ལྟར་བཤད་པ་དེ་དག་ཐམས་ཅད་སོ་སོ་ཐར་པའི་བསླབ་པ་ལ་བསྟན་པར་བྱས་ནས་གཏད་པའི་རབས་ཡིན་ནོ། །བསྟན་པའི་གཏད་རབས་ཀྱི་སྐབས་སོ། །
སྡེ་པ་བཅོ་བརྒྱད་དུ་གྱེས་པའི་སྐབས།
སོ་སོ་ཐར་པའི་བསྟན་པ་ཡང་སྡེ་པ་རྣམ་པ་བཅོ་བརྒྱད་དུ་གྱེས་པ་ལས། རྣམ་པ་བཅོ་བརྒྱད་པོ་ཐམས་ཅད་ཀྱང་སངས་རྒྱས་ཀྱི་བསྟན་པ་ཉིད་ཡིན་པ་ནི། མ་ག་དྷཱ་བཟང་མོའི་རྟོགས་པ་བརྗོད་པ་ལས། སངས་རྒྱས་འོད་སྲུངས་ཀྱི་དུས་སུ་དེའི་སྦྱིན་བདག་རྒྱལ་པོ་ཀྲྀ་ཀྲི་ཞེས་བྱ་བ་བྱུང་བ། དེའི་རྨི་ལམ་དུ་གླང་པོ་ཆེའི་རྒྱལ་པོ་སྐར་ཁུང་ནས་བྱུང་བ་ལ། དེའི་མཇུག་མ་ཐོགས་པ་དང༌། སྐོམ་པའི་ཕྱི་ནས་ཁྲོན་པས་སྙེག་པ་དང༌། ཕྱེ་བྲེ་གང་དང་མུ་ཏི་བྲེ་གང་ཚོང་བྱེད་པ་དང༌། ཙན་དན་དང་ཤིང་ཕལ་པ་རིན་མཉམ་པར་བྱེད་པ་དང༌། ཀུན་དགའ་ར་བ་མེ་ཏོག་དང་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པས་ཕྲོགས་པ་དང༌། གླང་པོ་ཕྲུ་གུས་སྤོས་ཀྱི་གླང་པོ་འཇིགས་པར་བྱེད་པ་དང༌། སྤྲེའུ་མི་གཙང་བས་གོས་པས་གཞན་ལ་སྐུད་པ་དང༌། སྤྲེའུ་རྒྱལ་པོར་དབང་བསྐུར་བ་མཐོང་བ་དང༌། རས་ཡུག་གཅིག་མི་བཅོ་བརྒྱད་ཀྱིས་བགོས་པ་ལས་རེ་རེའི་ལག་ཏུ་ཡང་རས་ཡུག་ཚང་མ་རེ་བྱུང་བ་དང༌། སྐྱེ་བོའི་ཚོགས་ཆེན་པོ་འདུས་ནས་འཐབ་ཅིང་