[A:52]ཡང་ལུགས་གསུམ་པ་ནི། སངས་རྒྱས་མྱ་ངན་ལས་འདས་ནས་ལོ་བརྒྱ་དང་སུམ་ཅུ་རྩ་བདུན་ན། རྒྱལ་པོ་དགའ་བོ་དང་པད་མ་ཆེན་པོའི་དུས། གྲོང་ཁྱེར་པ་ཏྲ་བི་བུ་ཏར་འོད་སྲུངས་ཆེན་པོ་ལ་སོགས་པ་སོ་སོ་ཡང་དག་པར་རིག་པ་ཐོབ་པ་རྣམས་བཞུགས་པ་ན། བདུད་ཀྱི་ཕྱོགས་སུ་གྱུར་པའི་དགེ་སློང་གནས་བརྟན་ཀླུའི་སྡེ་ཞེས་བྱ་བ་དང༌། ཡིད་བརྟན་པ་ཞེས་བྱ་བ་མང་དུ་ཐོས་པ་དག་གིས་གཞན་ལ་ལན་གདབ་པ་མི་ཤེས་པ། ཡིད་གཉིས། ཡོངས་སུ་བརྟག་པ། བདག་ཉིད་གསོ་བར་བྱེད་པ་སྟེ། གཞི་ལྔ་བསྔགས་པར་བྱེད་པས་རྐྱེན་བྱས་ནས་སྡེ་པ་གཉིས་སུ་གྱེས་ཏེ། གནས་བརྟན་པ་དང༌། དགེ་འདུན་ཕལ་ཆེན་པའོ། །དེ་ལྟར་དྲུག་ཅུ་རྩ་གསུམ་གྱི་བར་དུ་དགེ་འདུན་བྱེ་ཞིང་འཁྲུག་ལོང་གིས་གནས་པ་ལས། སངས་རྒྱས་མྱ་ངན་ལས་འདས་ནས་ལོ་བརྒྱ་ཕྲག་གཉིས་སོང་བ་ན། གནས་བརྟན་གནས་མའི་བུས་བསྟན་པ་ཡང་དག་པར་བསྡུས་སོ། ལུགས་གསུམ་པ་འདི་ལ་ནི་ཕལ་པ་ཆེན་པ་དྲུག་སྟེ། །ཕལ་ཆེན་པ་དང༌། ཐ་སྙད་གཅིག་པ་དང༌། བ་ལང་གནས་པ་དང༌། མང་དུ་ཐོས་པ་དང༌། བཏགས་པར་སྨྲ་བ་པ་དང༌། མཆོད་རྟེན་པ་རྣམས་སོ། །ཐམས་ཅད་ཡོད་པར་སྨྲ་བ་བདུན་ཏེ། ཐམས་ཅད་ཡོད་པར་སྨྲ་བ་དང༌། རྣམ་པར་ཕྱེ་སྟེ་སྨྲ་བ་དང༌། མང་སྟོན་པ་དང་། ཆོས་སྦས་པ་དང༌། གོས་དམར་བ་དང༌། འོད་སྲུངས་པ་དང༌། འཕོ་བ་པ་རྣམས་སོ། །གནས་མའི་བུ་པ་བཞི་སྟེ། །གནས་མའི་བུ་པ་དང༌། ཆོས་མཆོག་པ་དང༌། ལམ་བཟང་པ་དང༌། མང་