[A:763]འཁྲུངས། ཡབ་ཡུམ་གྱིས་ཆུང་ངུའི་དུས་ནས་ཁྲིད་བྱོན་ཏེ་གླང་ལིང་ལའི་ནང་ཁོངས་སུ་ཕེབས་པ་ན། ཞབས་ལ་ཟོམ་པ་ཆུང་ངུ་ཅིག་གྱོན་ནས་ཁ་བའི་ཐོག་ཏུ་བྱོན་པ་ཁ་བ་ལ་སོར་མོའི་རྗེས་མ་འདྲེས་པར་དོད་པ་ཡང་མཛད། འདི་རྗེ་སྒམ་པོ་བའི་སྐུའི་སྐྱེ་བ་ཡིན་ཏེ། ཆོ་འཕྲུལ་མང་པོ་བསྟན་པའི་ཐོག་མ་ནི་ཞབས་རྗེས་དེར་སྣང༌། ཕྱིས་གྲོང་པའི་བྱིས་པ་ཟླ་བོ་རིལ་ཤིང་འཐུར་སོང་བ་དེ་རྣམས་དང་འདྲ་བའི་བྱིས་པ་མང་པོ་སྤྲུལ། རྩེད་མོ་རྩེ་བ་ཡང་མཛད་སྤྲས་སུ་བུ་མོ་གཞོན་ནུ་མ་འགའི་རྒྱན་ཆ་འཕྲོག་པ་མཛད་པས་སྐྱེས་པ་མང་པོས་འདེད་པར་བརྩམས་པ་ན། བར་དུ་མཚོ་ཆེན་པོ་ཞིག་སྤྲུལ་པས་འོང་མ་ནུས། དེ་ལ་སོགས་པ་བྱིས་པའི་དུས་ཀྱི་ཆོ་འཕྲུལ་གྱི་མཛད་པ་ཤིན་ཏུ་མང༌། དགུང་ལོ་བཅུ་གསུམ་ལ་སངས་རྒྱས་ཡར་བྱོན་གྱི་སར་རབ་ཏུ་བྱུང༌། སངས་རྒྱས་ཡར་བྱོན་ལ་བཀའ་བརྒྱུད་ཀྱི་ཆོས་མ་ལུས་པ་དང༌། འགྲོ་བའི་མགོན་པོ་ཕག་མོ་གྲུ་པ་ནས་བརྒྱུད་པའི་སྟག་ལུང་པ་ལ་སྙན་བརྒྱུད་འབའ་ཞིག་ཏུ་བཞུགས་པ་རྣམས་ཀྱང་ལེགས་པར་གསན། གཞན་སྡེ་སྣོད་དང་རྒྱུད་སྡེ་ལ་འདི་མི་མཁྱེན་བྱ་བ་མེད་དེ། མཁན་པོ་ཐང་སག་པ་ལ་སོགས་པ་ལ་དབུ་མའི་འགྲེལ་པ་ཆེན་མོ་རྣམས་ལེགས་པར་གསུངས་པ་དང༌། གཞན་དོན་དུ་གཉེར་བ་ལ་གསང་བ་འདུས་པའི་འགྲེལ་པ་སྒྲོན་མ་གསལ་བ་ལ་སོགས་པ་མང་དུ་གསུངས། མཚན་ནི་གྲགས་པ་དཔལ་ཞེས་བྱ། སངས་རྒྱས་ཡར་བྱོན་གཤེགས་ཁར་གདན་ས་གཏད། སྤྱིར་སངས་རྒྱས་ཡར་བྱོན་དེས་སྐུ་མཚམས་འབའ་ཞིག་མཛད་པ་ལ། འཕགས་པ་བྱོན་པས་ཚོགས་སུ་བྱོན་