[A:768]ཏེ་རྒྱ་དུར་དགོན་པར་དགུང་ལོ་བཅོ་བརྒྱད་པ་ལ་མཁན་པོ་ཀླུབས་དཀར་དང༌། སློབ་དཔོན་གོང་གད་པ་གཉལ་དར་མ་གཟི་བརྗིད། གསང་སྟེ་བ་སློབ་དཔོན་མེ་ཆར་ལ་ཞུས་ཏེ་བསྙེན་པར་རྫོགས། ལོ་ལྔ་དྲུག་གི་བར་དུ་མཁན་པོའི་དྲུང་དུ་བཞུགས་ནས་འདུལ་བ་མཁས་པར་བསླབས་པས་བསྣུབས་འདུལ་བ་འཛིན་པར་གྲགས། ལོ་ཉི་ཤུ་རྩ་གཉིས་པ་ལྕགས་ཕོ་ཁྱིའི་ལོ་ལ་སྟེང་བ་ལོ་ཙཱ་བ་གཤེགས་པའི་འདད་དང༌། ལྟད་མོ་བྱས་ལུགས་རྣམས་དེར་ཕྱིན་པ་རྣམས་བོས་ཀྱང་གསལ་བར་གཟིགས་པའང་བྱུང༌། དགུང་ལོ་ཉི་ཤུ་རྩ་ལྔ་ལ་ཉི་ཟླ་སྒང་དུ་སློབ་དཔོན་གྱི་ཆོས་བཞི་བྱུང་བའི་ཚེ་ཞར་ཆོས་པ་མཛད་ནས་མདོ་རྩ་བ་ཐུགས་ནས་གསུངས། མཁན་པོ་ལ་ཕལ་པོ་ཆེ་སྤོང་བརྒྱད་མ་ཅིག་དང༌། ཁྲབ་བཟང་བ་ཅིག་གིས་སྣ་དྲངས་པའི་འབུལ་བ་ཕུལ་བས་མཁན་པོ་མཉེས། ཁྱོད་ལ་སྐྱེ་བ་འདི་ལ་ཆོས་མང་པོ་བསྡུད་པ་ཅིག་འོང་གསུང༌། དགུང་ལོ་ཉི་ཤུ་རྩ་བརྒྱད་པ་ལ་དགེ་འདུན་བྱ་ཞིང་པའི་གཉེར་བཟང་བ་ཅིག་མཛད། ལོ་དེ་ལ་མཁན་པོ་ཀླུབས་དཀར་གཤེགས་པས་མྱ་ངན་སྐྱེས་པའི་སྐྱོ་བསངས་ལ་བོས་རི་བ་དང་འགྲོགས་ཏེ་གྲར་ཕེབས་པའི་ཚེ། ཟྭ་ར་ན་སྐལ་ལྡན་ཡེ་ཤེས་སེང་གེ་བྱ་བ་སངས་རྒྱས་དངོས་ཅིག་བཞུགས། སྦྲང་མས་གདུགས་ཕུབ། ཕག་མོ་གྲུ་པའི་བུ་ཆེན་ཡིན་ཟེར་བ་གསན་ནས་དད་པ་སྐྱེས་ནས་ཟྭ་རར་བྱོན་པས། ཞལ་མཇལ་བ་ཙམ་གྱིས་བླ་མའི་ཐུགས་དང་གཉིས་སུ་མེད་པའི་རྟོགས་པ་འཁྲུངས། དེ་ནས་གཙང་ཕྱོགས་སུ་ཡུལ་ལྟད་མཛད། ཞིག་པོ་བདུད་རྩི་དང་མཇལ་ནས་ནས་འགྱེད་བླངས། སློབ་