[A:785]ནས་ཕྱག་རྒྱ་ཆེན་པོའི་རྟོགས་པ་ཤར་བ་སྟོང་ཕྲག་ལྔ་ཙམ། ཨུ་རྒྱན་དང་ཛ་ལནྡྷར་དང་ཁ་ཆེ་དང་བྱ་རྒོད་ཕུང་པོའི་རི་བོ་དང༌། རྒྱའི་རི་བོ་རྩེ་ལྔ་དང་ཙ་རི་དང་ཤ་འུག་སྟག་སྒོ་དང་ཏི་སེ་ལ་སོགས་པའི་གནས་དག་ཏུ་ཚེ་དང་སྒྲུབ་པ་སྙོམས་པ་གྱིས་གསུང་བའི་བཀའ་གནང་ནས། འཁོར་འགྱེད་པ་མཛད། བྱ་རྒོད་ཀྱི་ཉིན་ལམ་བཅོ་བརྒྱད་དུ་འབྲུག་པའི་བུ་སློབ་ཀྱིས་མ་ཁྱབ་པ་མེད་བྱ་བ་བྱུང་སྟེ། འབྲུག་པ་ལ་གཏོགས་པའི་སྒོམ་ཆེན་ཡིན་ཕྱིན་ཆད་སྡེ་རིས་དང་སློབ་རིས་ཀྱི་ཆགས་སྡང་དང་འཁྲུག་པ་མེད་ཅིང་ཤིན་ཏུ་དུལ་བ་ཤ་སྟག་འབྱུང་ངོ༌། །ཆོས་རྗེ་འདི་ནི་དཔལ་ནཱ་རོ་པའི་སྤྲུལ་པར་གྲགས་ཤིང༌། ཕལ་ཆེར་དེ་ལ་ངེས་པ་ཡང་འཇོག་གོ །དེ་ནས་སྐུ་ཚེ་འདིའི་ཕྲིན་ལས་རྫོགས་ནས་དགུང་ལོ་ལྔ་བཅུ་རྩ་གཅིག་པ་ལྕགས་མོ་ལུག་གི་དབྱར་ཟླ་ཐ་ཆུངས་ཀྱི་མར་ངོའི་ཚེས་བཅུའི་ཐོ་རངས་ལ་གཤེགས། གདུང་བཞུ་བའི་ཉིན་འཇའི་གུར་དང་མེ་ཏོག་གི་ཆར་བབ། སྒལ་ཚིགས་ཉི་ཤུ་རྩ་གཅིག་ལ་སྤྱན་རས་གཟིགས་ཀྱི་སྐུ་ཉི་ཤུ་རྩ་གཅིག་བྱོན་ནས་ཕལ་ཆེ་བར་ལུང་དུ་གདུང་རྟེན་དུ་བཞུགས་སོ། །འདིས་གཞན་དོན་རྒྱ་ཆེར་བསྐྱངས་པའི་སློབ་མའི་མཆོག་ནི། དང་པོར་ཆེ་བ་སྤ་རྐྱང་གཉིས། བར་དུ་ཆེ་བ་རྒྱ་འབྲས་གཉིས། ཐ་མར་ཆེ་བ་ལོ་རྒོད་གཉིས། ཞེས་བྱའོ། །
དེ་ལ་སྤ་རི་བ་ནི། དང་པོར་བླ་མ་ཞང་གི་གཏོར་བཤོམས་པ་ཡིན་ལ། ཆོས་རྗེ་གཙང་པ་རབ་བྱུང་ལ་བྱོན་དུས་ཆོས་རྗེ་གཙང་པ་ཡང་མཉེས། ཁོང་རང་ཡང་གུས་པར་བྱུང་བ་ཡིན། སྤ་རི་བ་ལ་གཙང་བས་ཕན་ཐོགས་