[A:801]ཞལ་ནས་ཁྱེད་ཐུགས་དམ་འཕེལ་བར་བྱུང་འདུག་པས། ད་ངའི་ཁྲིད་གཉེར་བ་གྱིས་གསུང༌། ཁོ་བོ་ལ་སྟོད་དུ་འགྲོ་འདོད་ཞུས་པས་མ་གནང༌། གྲོགས་པོ་ཀུན་ན་རེ་ཡང་འགྲོ་རྒྱུ་མི་འོང་ཟེར་བ་ལ། གྲུབ་ཐོབ་ཡིན་ཡིན་ལྟ་བྱས་ནས་ལྐོག་ཏུ་མཎྜལ་མང་པོ་ཕུལ། གཟོད་ཞུ་བ་ཕུལ་བས། ད་འོ་ན་སོང༌། བསྟན་པ་མེད་པའི་ས་ཕྱོགས་སུ་བླ་མའི་བསྟན་པ་དར་བར་བྱས་ན་དེ་རང་ཞབས་ཏོག་ཏུ་ཆེ་གསུང༌། དེར་ལ་སྟོད་དུ་བྱོན་ནས་བྱ་རོག་ཚང་དུ་ཕ་སྒྲུབ་པ་ཞིག་པོ་དང་མཇལ་བས། ཀུན་དུ་བཟང་པོ་བྱ་བ་འདི་རང་ཡིན་སྙམ་པའི་མོས་པ་བྱུང༌། གདམས་ངག་ཀྱང་ཞིབ་ཚགས་དང་བཅས་ཏེ་གནང༌། དེ་ནས་ཁྱུང་དཀར་དུ་ལོ་གསུམ་བཞུགས་པས་ཐུགས་དམ་ཤིན་ཏུ་འཕེལ། དེར་ཤིག་ནད་དྲག་པོ་ཞིག་བྱུང་ནས་འགྲོངས་པ་ལ་ཕྱོགས་ཡོད་ཙ་ན། ཉེ་གནས་བསོད་སྙོམས་ལ་སོང་བ་དེ་ཡང་བྱ་རོག་ཚང་དུ་ན་བས། ད་ངས་ཁོ་བློས་བཏང་བས་མི་འོང་དགོངས་ནས་འབྱོན་པའི་འདུན་པ་བཏང་འཕྲལ་ལ་ཤིག་ནད་དེ་ཡང་སོས། །བྱ་རོག་ཚང་དུ་བྱོན་ནས་ཉེ་གནས་བླངས་ཏེ་གསོས་པས་དཔོན་སློབ་གཉིས་ཀ་དྭངས། ཡང་ཡང་དཀར་དུ་རྗེ་བཙུན་མི་ལའི་ཞབས་རྗེས་ཡོད་སར་དབྱར་ཅིག་བཞུགས་པས་ཀྱང་ཐུགས་དམ་འཕེལ། དེ་ནས་རྒོད་ཚང་དུ་སྐྱེས་ནས་མཚམས་ཀྱི་དམ་བཅའ་དྲག་པོ་མཛད། མནལ་ལམ་དུ་བུད་མེད་ཅིག་ལ་ངས་མཚམས་བྱས་པ་དང༌། གཞན་དོན་བྱས་པ་ཁེབས་གང་ཆེ་བྱས་པས། མཚམས་བྱས་ན་གཞན་དོན་ཆེན་པོའང་འོང་ཟེར་བས་མཚམས་མཛད། གྲོགས་པོ་སྒོམ་གྲགས་ཀྱིས་ཐབས་ལམ་བསྒོམས་པས་