[A:803]དགོན་པ་མང་དུ་བཏབ། དགོན་པ་རེ་རེ་ནས་ཀྱང་དགེ་འདུན་སྒྲུབ་པ་པོ་སྟོང་ཚོ་མང་པོ་ཐོན་པ་བྱུང༌། དེ་ཡང་ཆོས་རྗེ་འདིས་དགུང་ལོ་བཅུ་དགུ་ལ་རབ་ཏུ་བྱུང་ནས་ལོ་ངོ་གསུམ་གཙང་པའི་དྲུང་དུ་བཞུགས། ཉེར་གཅིག་ལ་སྒྲུབ་པའི་ཁོངས་ནས་གཞན་དོན་དུམ་རེ་མཛད། མཁར་ཆུར་ལོ་གསུམ་དང་ཉི་ཤུ་རྩ་ལྔ། ཏི་སེ་དང་ཛ་ལནྡྷ་རར་ལོ་བཞི་སྟེ་ཉི་ཤུ་རྩ་དགུ། ལྷ་ཁབ་ཏུ་ལོ་གསུམ་སྟེ་སོ་གཉིས། ཙ་རིར་ལོ་གསུམ་སྟེ་སོ་ལྔ། ཁྱུང་དཀར་དང་ཡང་དཀར་གཉིས་སུ་ལོ་གསུམ་སྟེ་སོ་བརྒྱད། རྒོད་ཚང་དུ་ལོ་བདུན་ཏེ་ཞེ་ལྔ། སྟེང་གྲོར་ལོ་བཅུ་གསུམ་བཞུགས་ཏེ་ལྔ་བཅུ་རྩ་བརྒྱད། བདེ་ཆེན་སྟེངས་དང་དགའ་ལྡན་གཉིས་སུ་ལོ་ཧྲིལ་པོ་དགུ་སྟེ་དྲུག་ཅུ་རྩ་བདུན། སྦྱང་དུ་སེང་གེ་གླིང་དང་ཧོང་ཐང་གཉིས་སུ་ལོ་གཅིག་སྟེ་རེ་བརྒྱད། རྡོ་རྗེ་གླིང་དུ་ལོ་གཉིས་བཞུགས་ཏེ་བདུན་ཅུའོ། །དེ་ལྟར་ས་ཕོ་རྟ་ལ་དགོངས་པ་ཡོངས་སུ་མྱ་ངན་ལས་འདས་རྗེས་བཀའ་བརྒྱུད་ཀྱི་བསྟན་པ་འཛིན་པའི་སྐྱེ་བ་ཅིག དེའི་རྗེས་སུ་བྱང་ཆུབ་སེམས་དཔའ་མ་ཆགས་པདྨའི་སྤྱན་བྱ་བར་སྟེང་ཕྱོགས་སུ་འཁྲུངས་ནས་རྩོལ་མེད་ཀྱི་གཞན་དོན་མཛད། དེ་རྗེས་འཇིག་རྟེན་གྱི་ཁམས་རྡུལ་དང་བྲལ་བ་ཞེས་བྱ་བར་དེ་བཞིན་གཤེགས་པ་རྡུལ་སེལ་ཞེས་བྱ་བར་སངས་རྒྱའོ་ཞེས་བཀའ་བསྩལ་ཏོ། །གཤེགས་རྗེས་སུ་ཁྲལ་བསྡུད་དང་རྟེན་བཞེངས་པ་སོགས་མ་བྱེད་པར་རི་ཁྲོད་རྣམས་སུ་ཚེ་བློས་བཏང་གི་སྒྲུབ་པ་གྱིས། མ་ཐའང་རི་ཁྲོད་ལོ་རེ་མའི་བཀའ་རྒྱ་ཡང་གནང་ངོ༌། །དེ་ལ་སློབ་མ་མང་དུ་བྱུང་བ་ལས་ཐུགས་