[A:809]ཁྲི་ཕྲག་བརྒལ། སློབ་མ་རྣམས་ཀྱིས་བསྐུལ་བས་རི་ཆོས་སྐོར་གསུམ་དང་མ་དྲུག་ལ་སོགས་པའི་བརྩམས་ཆོས་ཀྱང་མང་དུ་མཛད། མཐར་ཞེ་དྲུག་བཞེས་པ་ས་ཕོ་རྟའི་ལོ་ལ་བར་འབྲོག་ཏུ་བྱོན། དེར་ལྕགས་དུར་དུ་སྐུ་ཁམས་ཞན་པའི་ཚུལ་བསྟན། དེ་ནས་ཤྲཱི་རིར་སྤྱན་དྲངས་ཏེ་དེར་ཚེས་བཅུ་དགུ་ཅིག་ལ་གཤེགས། དེའི་སློབ་མ་ཡང་རྟོགས་པ་དང་ལྡན་ཞིང་འཇིག་རྟེན་ལ་མ་ཆགས་པའི་སྒྲུབ་པ་པོ་མང་དུ་བྱུང་མོད་ཀྱི། གཙོ་བོ་ནི་སྤྱན་སྔ་རིན་ཆེན་ལྡན་ཞེས་བྱ་བ་སྐུ་ཤིན་ཏུ་ཕྲ་བའི་དུས་ནས་ཞབས་ལ་གཏུགས་ཏེ་འབྲལ་མེད་དུ་བཞུགས་ནས་བཀའི་བསྡུ་བ་པོ་མཛད་པ་དེ་དང༌། ལོ་རས་ཆོས་སྐྱོང་དཔལ་ཞེས་བྱ་བ་རྩ་རླུང་ལ་དབང་འབྱོར་བ་དེ་གཉིས་ནི་གཙོ་བོའོ། །
དེའི་སློབ་མ་སྤྱན་སྔ་རིན་ཆེན་ལྡན་ནི། དིང་རིར་ཡབ་ཡུམ་བསགས་པ་ཅན་གྱི་སྲས་སུ་ཆུ་ཕོ་ཁྱིའི་ལོ། ཡང་དགོན་པ་ལས་བཅུ་གཅིག་གིས་སྔ་བ་དེ་ལ་འཁྲུངས། ལོ་ལྔ་དྲུག་ལོན་དུས་སུ་གླ་འཁོར་གྱི་སྐུ་གདུང་ག་རུ་ལ་སོགས་དང་མཇལ། སྙིང་ནས་ཆོས་བྱེད་པའི་ཞེན་ལོག་དེ་དུས་རང་ནས་སྐྱེས། དེར་རི་པ་འགའ་ཞིག་གིས་ལྷ་གདོང་ན་སྤྲུལ་པའི་སྐུ་བཞུགས་པའི་སྔགས་པ་བརྗོད་པས་ཤིན་ཏུ་དད། ཕྱིས་ལྷ་གདོང་པ་ལོ་ལྔ་བཞེས་པ་དིང་རིར་བཞུགས་པ་དང་མཇལ། མོས་གུས་ཐུན་མོང་མིན་པ་འཁྲུངས། ཏིང་ངེ་འཛིན་ཡང་རྩོལ་མེད་དུ་སྐྱེས། ཆོས་འབྲེལ་ཞུས་པས་བླ་མའི་རྣལ་འབྱོར་དང༌། ཕྱག་རྒྱ་ཆེན་པོ་ཡི་གེ་བཞི་པ་གསན། ཕ་ཇོ་སྟོན་པ་ལ་འབྲི་ཀློག་ལ་སོགས་བསླབ་ཞིང་གསན་པ་མང་དུ་མཛད། དེ་ནས་ལྷ་གདོང་པ་ཆོས་