[A:825]མཐའ་དག་ནས་གདུལ་བྱ་འདུལ་ལོ། དེ་ལ་གདན་ས་བ་བསོད་ནམས་རྒྱལ་མཚན་ས་ཕོ་བྱི་བ་ལ་འཁྲུངས། ལྔ་བཅུ་རྩ་དྲུག་པ་ཆུ་མོ་ལུག་གི་བར་དུ་བཞུགས། དེ་ནས་ད་ལྟའི་མེ་ཕོ་སྤྲེའུའི་བར་དུ་ལོ་བཅུ་གསུམ་སོང་སྟེ། སྤྱིར་ཕག་མོ་གྲུ་པ་གཤེགས་པའི་ལྕགས་སྟག་ནས་དྲུག་ཅུ་རྩ་གཅིག་པ་ལ་གྲུབ་ཆེན་པ་འཁྲུངས། དེའི་དྲུག་ཅུ་རྩ་གཅིག་པ་ལ་བུ་སྟོན་རིན་པོ་ཆེ་འཁྲུངས། དེའི་དྲུག་ཅུ་རྩ་གཅིག་པ་ལ་ཆོས་རྗེ་མཁའ་སྤྱོད་པ་དང༌། ཆོས་རྗེ་སྒྲོན་མ་པ་དང་མཁན་ཆེན་རིན་པོ་ཆེ་རྒྱལ་མཚན་བཟང་པོ་རྣམས་འཁྲུངས། དེ་ནས་དྲུག་ཅུ་སྐོར་གཉིས་དང་ལོ་བདུན་མེ་ཕོ་སྤྲེའུ་ཡན་ལ་སོང་ངོ༌། གྲུབ་ཆེན་པ་སློབ་བརྒྱུད་དང་བཅས་པའི་སྐབས་ཏེ། སྤྱིར་འབྲུག་པའི་སྐབས་སོ།
ཁྲོ་ཕུ་པའི་སྐབས།
འགྲོ་མགོན་རིན་པོ་ཆེའི་བུ་ཆེན་རིན་པོ་ཆེ་རྒྱལ་ཚ་ནི། ཤ་བ་སྨད་འཛལ་གྱི་ལུང་པར་སྣུབས་ནམ་མཁའ་སྙིང་པོའི་གདུང་བརྒྱུད་སྔགས་རྙིང་མའི་དངོས་གྲུབ་ལ་མངའ་མཛད་པ་ཤ་སྟག་བྱུང་བ་དང༌། ཡུམ་ལྷ་གཅིག་གི་སྲས་སུ་ས་ཕོ་ཁྱིའི་ལོ་ལ་འཁྲུངས། ལོ་ལྔ་ནས་ཡིག་རྩིས་བསླབས། བྱིས་པའི་དུས་ནས་འཇིག་རྟེན་ལ་མ་ཆགས་ཤིང་ཆོས་ལ་དགའ། བླ་མ་བསྟེན་པ་ལ། གནུར་ཉི་མ། སློབ་དཔོན་གན་ཆག་པ། རམ་སྡིང་མ་བ། དགེ་བཤེས་རྩི་གཉན། གྲོལ་སྟོན་ལྷ་འབུམ། བླ་མ་སྒང་རི་བོ་ཆེ་པ། ཟུར་ཆུང་