[A:831]ཆེན་སྤྱན་དྲངས་ནས་ཤིང་ཕོ་བྱི་བའི་ལོ་ལ་བོད་དུ་ཕེབས། པཎ་ཆེན་གྱིས་བྱང་རྭ་སྒྲེང་ཚུན་ནས་ལྷོ་བྲག་དང་གཉལ་སྨད་ཡན་དུ་འགྲོ་བའི་དོན་མཛད། བོད་དུ་ལོ་བཅུ་བཞུགས་པའི་བར་གྱི་ལོ་ཙཱ་རྣམས་ལོ་ཙཱ་བས་མཛད་ཅིང༌། ཕྱག་ཏུ་འབུལ་བ་སྟོབས་ཆེན་པོ་བྱུང་བ་རྣམས་ཕལ་ཆེར་ལྷའི་ཆ་རྐྱེན་དུ་གནང༌། གཞན་རྣམས་ཅི་རིགས་པར་སྡེ་སྣོད་འཛིན་པ་ལ་སོགས་པ་ལ་གནང་སྦྱིན་དུ་མཛད། ཕྱིས་ཁ་ཆེར་གཤེགས་པ་ན་མངའ་རིས་ཀྱི་བར་དུ་སྐྱེལ་ཐུང་མཛད། དཔོན་སློབ་འབྲལ་ཁར་པཎ་ཆེན་གྱིས་འཁོར་གཞན་རྣམས་སྐུ་མདུན་དུ་མེད་པར་བྱས། གསེར་སིལ་མ་སྲང་སུམ་བརྒྱ་གནང༌། དེ་ནས་པཎ་ཆེན་ནི་བོད་ཀྱིས་ཕུལ་བའི་རྫས་ཅུང་ཟད་ཀྱང་མ་བསྣམས་པར་ཁ་ཆེར་བྱོན་ནས། དེར་ལོ་བཅུ་གཉིས་བཞུགས་ཏེ། ཁ་ཆེའི་བསྟན་པ་ཉམས་པ་རྣམས་ལེགས་པར་གསོས་ཤིང་དེར་རྒྱས་སུ་མཛད་ནས་ཤིང་མོ་བྱའི་ལོ་ལ་གཤེགས་ཞེས་གྲགས། དེ་ལྟར་ལོ་ཙཱ་བས་པཎ་ཆེན་གསུམ་སྤྱན་དྲངས་པ་གཙུག་ལག་ཁང་ལྷ་ཆེན་དང་བཅས་པ་བཞེངས་པ་ལ་སོགས་པའི་རྣམ་པར་ཐར་པ་རྣམས་ཤིན་ཏུ་རྒྱ་ཆེ་བ་ལས་ཕྱོགས་ཙམ་བསྡུས་ཏེ་བྲིས་པ་ཡིན། སྐུ་ཚེའི་སྨད་ལ་དབུས་སུ་འབྱོན་ཁར་ཁྲོ་ཕུ་སེམས་དཔའ་ཆེན་པོ་བསྐྱེད་པའི་ཆོ་ག་མཛད་ནས་དབུས་སུ་ཕེབས་ཏེ། གཤེགས་སའང་དབུས་ཡིན། དེ་ལ་རིན་པོ་ཆེ་རྒྱལ་ཚ་དང་ཀུན་ལྡན་རྣམ་པ་གཉིས་ནི་རྗེ་ཕག་མོ་གྲུ་པས་ཕྱག་རྒྱ་ཆེན་པོའི་རྟོགས་པ་བསྐྱེད་པའི་དངོས་ཀྱི་སློབ་མ་ཡིན། ཆོས་རྗེ་ལོ་ཙཱ་བ་ཡང་རིན་པོ་ཆེ་རྒྱལ་ཚའི་གདམས་པ་ལ་བརྟེན་ནས་ཕྱག་རྒྱ་ཆེན་པོའི་རྟོགས་