[A:86]པ་ལ་བསྟན་པ་བྱུང་བའི་ཐོག་མར་འཁྲུལ་ལོ་སྙམ་མོ། །དེ་ནས་ཀླུ་མེས་དང་སུམ་པས་གཙུག་ལག་ཁང་བརྩིགས་ཤིང་དགེ་འདུན་གྱི་སྡེ་འཕེལ་བ་ལ། ཀ་བ་བཞི། གདུང་བརྒྱད། ལྕམ་སུམ་ཅུ་སོ་གཉིས། དྲལ་མ་དཔག་ཏུ་མེད་པ་བྱུང་བར་གྲགས། རག་ཤི་ཚུལ་ཁྲིམས་འབྱུང་གནས་ནི་ཁམས་སུ་བཞུད་དེ་མཆེད། སྦ་དང་དེ་གཉིས་མཁན་པོ་མི་གཅིག །སྦ་བཙུན་བློ་གྲོས་འབྱུང་གནས་ཀྱིས་བུ་ཚལ་གསེར་ཁང་བཟུང་ནས། དེའི་མཁན་བུ་སྤྱན་འོག་བློ་གྲོས་རྒྱལ་མཚན་ལ་སོགས་པ་རྣམས་ཀྱིས་ལྕེ་ས་ལ་སོགས་པའི་གཙུག་ལག་ཁང་མང་དུ་བཙུགས། འབྲིང་ཡེ་ཤེས་ཡོན་ཏན་གྱིས་ལྷ་ལུང་ལ་བརྟེན་ནས་ཁམས་གསུམ་ཟངས་ཁང་དང༌། འཕྱོས་ཀྱི་དོག་པ་དང༌། གང་པར་ལྷ་ཁང་དང༌། དེའི་མཁན་བུ་རྣམས་ཀྱིས་དབུ་རུ་སྐར་ཆུང་དང༌། གཉལ་གྱི་ཆོས་སྒྲོར། བྲེ་གུ་ར་ལ་སོགས་པ་དགེ་འདུན་གྱི་སྡེ་མང་དུ་འཕེལ་ལོ། །དེ་ཡང་དབུས་གཙང་མི་དྲུག་ཕྱག་ཕེབས་ནས། གཞན་བསྙེན་པར་རྫོགས་པ་ལ་དད་པའི་དགེ་འདུན་ཡང་ངེས་པར་དགོས་པས། འབྲོམ་སྟོན་པས་གསུང་བའི་ས་ཕོ་སྟག་ལ་གཙུག་ལག་ཁང་རྩིགས་པའི་ནུས་པ་མེད་ཀྱང་དགེ་སློང་གི་དགེ་འདུན་རིམ་པར་བྱོན། དེ་ནས་ནུས་པ་ཅན་གྱི་ཀླུ་མེས་ལ་སོགས་པ་བྱོན་པ་ཡིན་ནམ་སྙམ་མོ།། །།