[A:899]འཁོར་བྱུང་བ་དང་དུས་མཚུངས་པར་འདོད་པ་ཡིད་ཅུང་ཟད་འགྲིག་དཀའ་སྟེ། ཨ་བྷ་ཡས་དུས་ཀྱི་འཁོར་ལོ་ལ་འཇུག་པ་བརྩམས་པ་ན་ལོ་དྲུག་ཅུ་སྐོར་ཅིག་སོང་བར་གཞུང་དེ་ཉིད་ལས་བཤད་ཅིང༌། དྲུག་ཅུར་མ་ལོངས་པ་བཞི་བཅུ་རྩ་ལྔའོ་ཞེས་རཏྣ་རཀྵི་ཏས་གསུང་ངོ་ཞེས་ཆག་ལོ་ཙཱ་བའི་ཡི་གེར་འབྱུང་ལ། བོད་ཀྱི་བླ་མ་རྣམས་ཀྱི་ལོ་དང་སྦྱར་ན་མར་པ་དང་གྲྭ་པ་མངོན་ཤེས་ཀྱི་ལོ་བཅུ་དྲུག་པ་དང་འགྲིག་ལ། དེའི་ཚེ་བོད་དུ་ཡང་དུས་འཁོར་བྱུང་ཟིན་པའི་ཕྱིར་རོ། །དེ་ལ་དུས་ཞབས་པ་ཆུང་བའི་ཡབ་ཤྲཱི་བྷ་དྲ་བོ་དྷི་ནི་གྱི་ཇོ་དང་ལྷན་དུ་དུས་འཁོར་བསྒྱུར་བ་པོ་ཉིད་ཡིན་པ་འདྲ་ལ། དུས་ཞབས་པ་ཆུང་བའི་སློབ་མ་ནཱ་ལེནྡྲ་པ་ཞེས་བྱ་བས་བོད་དུ་ཡང་ཡུག་ཅིག་བྱོན་ཞེས་བྱ་བ་ལ་སོགས་པའི་གཏམ་སྣང་ངོ༌། །ཁ་ཆེ་ཟླ་བ་མགོན་པོ་ནི། ཚིགས་སུ་བཅད་པ་བཅུ་དྲུག་ལན་རེས་འཛིན་ནུས་པ་དང། བྱང་སེམས་འཛག་མེད་དུ་ཆིངས་པའི་ཡོན་ཏན་དང་ལྡན། བོད་དུ་དུས་འཁོར་དུ་མ་ཟད་སྒྲོན་གསལ་མན་ངག་གི་བཤད་པ་དང༌། རྩ་བ་ཤེས་རབ་ཀྱི་བཤད་པ་ཡང་མཛད། དེ་ལས་བརྒྱུད་པའི་ཡི་གེའང་མཐོང་ངོ༌། །བོད་སྐད་བྱང་བས་དོན་དམ་བསྙེམ་པའི་འགྱུར་མཛད་དེ་ཤིན་ཏུ་བཟང་ལ། ཕྱིས་མངའ་རིས་སུ་བྱོན་ཏེ་དུས་ཀྱི་འཁོར་ལོའི་འགྲེལ་ཆེན་ཡང་ཁོང་ཉིད་ཀྱིས་བསྒྱུར་རོ་ཞེས་གྲག་གོ ལྕེ་ཡབ་སྲས་ཀྱིས་ཟླ་མགོན་ལས་དུས་འཁོར་གསན་ནས། དེ་ལ་འགོ་ཉི་མས་གསན་ལ་སླར་ཡང་གཉན་ལོ་སོགས་ལས་ཀྱང་གསན་པར་གྲགས་ལ། ཡུ་ཆོ་ཡང་འདིའི་སློབ་མ་ཡིན་མོད་ཀྱི་བཤད་པའི་རྒྱུན་ནི་མ་དར་བ་འདྲའོ། །སྒོམ་