[A:928]མང་པོ་དང༌། གཞན་ཡང་མི་ཆེ་བའི་སློབ་མ་མང་པོ་དང༌། ལོ་ཙཱ་བ་ཡར་ཐར་དཔང་གསུམ་གྱིས་དབུ་མཛད་མཁས་བཟང་བཙུན་པའི་སློབ་མ་ཤིན་ཏུ་མང་པོ་དང༌། ཁྱད་པར་དུས་འཁོར་ལ་མཁས་པའི་སློབ་མ་མང་པོ་བྱུང་ངོ༌། སྲས་གསུམ་པ་སློབ་དཔོན་རྣལ་འབྱོར་གྱིས་ཡུལ་འཁོར་བསྐྱངས། སྲས་བཞི་པ་བླ་མ་ཨཱ་ཀ་ར་སིངྡྷི་དུས་འཁོར་རྭ་ལུགས་འབྲོ་ལུགས་དཔྱལ་བ་དང༌། ས་སྐྱ་པའི་ཆོས་སྐོར་མ་ལུས་པ་མཁྱེན་ནོ། །དེའི་སྲས་བླ་མ་རྡོ་རྗེ་རྒྱལ་མཚན་པ་ནི། ཆུ་མོ་ལུག་གི་ལོ་ལ་འཁྲུངས། གཞོན་ནུའི་དུས་ནས་འབྲི་ཀློག་བསླབས། འཇམ་དབྱངས་རིན་རྒྱལ་དང༌། སློབ་དཔོན་ཤེས་རྒྱལ་ལ་མཁན་སློབ་ཞུས་ནས་རབ་ཏུ་བྱུང༌། དགུང་ལོ་བཅུ་དྲུག་ལ་དབེན་དམར་གྱི་གདན་ས་གཟུང༌། དུས་འཁོར་གྱི་བཤད་གྲྭ་བསྐྱངས། མཁན་པོ་བཀའ་བཞི་པ་དང༌། མཁན་པོ་ཞལ་སྔ་བ་ལས་བསྙེན་པར་རྫོགས། ཐར་པ་ལོ་ཙཱ་བ་ལ་སྒྲ་ཙནྡྲ་པ་དང་ཡི་གེའི་རིགས་ཐམས་ཅད་བསླབས། མངོན་པ་དང་མན་ངག་སྒྲུབ་ཐབས་མང་པོ་གསན། བླ་མ་ཤེས་རབ་སེང་གེ་བ་ལ་དུས་འཁོར་གྱིས་གཙོ་བྱས་པའི་དབང་གི་བཀའ་ཐམས་ཅད་ཞུས་ཤིང་བུམ་པ་གང་བྱོའི་ཚུལ་དུ་མཁྱེན། གཞན་ཡང་མཁན་པོ་ཞལ་སྔ་བ་ལ་འདུལ་མཛོད། མཇོ་བོ་ལྷས་པ་སངས་རྒྱས་སྒོམ་པ་ལ་སྒང་ལོ་ཙཱ་ནས་བརྒྱུད་པའི་རྡོ་རྗེ་ཕྲེང་བ། གསང་འདུས། ཇོ་བོ་ལུགས་ཀྱི་བདེ་མཆོག ལམ་འབྲས་ལ་སོགས་པའི་མན་ངག་དང༌། གཞན་ཡང་རྒྱུད་མང་པོ་ཞུས། སྲིའུ་ཆུང་བ་བློ་ལྡན་སེང་གེ་ལ་གསང་འདུས། ཡོ་ག གསང་ལྡན། གདན་བཞི་ལ་