[A:933]སློབ་ཐམས་ཅད་ལ་འབུལ་བ་བཟང་པོ་བརྫངས། པཎྜི་ཏ་ཉིད་བོད་དུ་འབྱོན་པར་ཞུས་པས་བྱོན་ཏེ་དིང་རིར་ཕེབས། ཀོ་བྲག་པ། དཔྱལ་ཨ་མོ་གྷ། གཡུང་ཕུག་པ། ཉེག་པོ་ཆོས་ལྡན། མར་སྟོན་གཡང་འབར་རྣམས་ལ་གདམས་པ་དེ་གནང༌། པཎྜི་ཏ་ཉིད་ཀྱིས་ཀོ་བྲག་པ་ལ་ཡང་གདམས་པ་གསན། གདམས་པ་དེས་མང་དུ་ཁྱབ་ཅིང་ཁྱད་པར་དུ་ཀུན་སྤངས་ཞང་གིས་སོ་སོར་སྡུད་པ་ལུགས་དེ་ཁོ་ན་ལ་མཛད་དོ། ཡང་ཁ་ཅེ་པཎ་ཆེན་གྱིས་ལོ་ཙཱ་བ་དཔྱལ་ཆོས་ཀྱི་བཟང་པོ་ལ་བརྟག་གཉིས་ཀྱི་འགྲེལ་པ་ནཱ་རོ་པས་མཛད་པ་དང༌། དེའི་ཡན་ལག་དྲུག་གི་མན་ངག་ཀྱང་གནང༌། མན་ངག་དེ་ལོ་ཙཱ་བས་རིན་པོ་ཆེ་སྒྲོམ་གྱི་ལྡེ་མིག་ཅེས་པའི་གཞུང་དུ་སྡེབས། དེའི་འགྲེལ་པ་ལོ་ཙཱ་བའི་སློབ་མ་གཉལ་བ་ཧྲུལ་པོ་ཞེས་བྱ་བས་མཛད་དེ། དིང་སང་གི་བར་དུ་ཡང་གནས་སོ།
གཞན་ཡང་དཔལ་དུས་ཀྱི་འཁོར་ལོའི་དབང་དང་མན་ངག་མཆོག་ཏུ་གྱུར་པ་ནི་རྗེ་བཙུན་མཁས་པ་ཆེན་པོ་དཔལ་ནགས་ཀྱི་རིན་ཆེན་གྱི་ཞལ་སྔ་ལས་བྱུང་སྟེ། དེ་ཡང་པཎ་ཆེན་རིན་པོ་ཆེ་དེ་ནི་རྒྱ་གར་ཤར་ཕྱོགས་གྲོང་ཁྱེར་དམ་པ་ཞེས་བྱ་བའི་གནས་སུ་རྒྱལ་པོའི་སྲས་སུ་སྐུ་འཁྲུངས། དགུང་ལོ་བརྒྱད་བཞེས་པ་ན་དགེ་འདུན་འབུམ་ཕྲག་མང་པོའི་འདྲེན་པ་སངས་རྒྱས་དབྱངས་ཤེས་བྱ་བ། རིག་པའི་གནས་མཐའ་དག་ལ་མཁས་ཤིང་མངོན་པར་ཤེས་པ་རྒྱ་ཆེན་པོ་དང་ལྡན་པ་དེས་མཧཱ་ཙི་ཏྱ་ཞེས་བྱ་བའི་གཙུག་ལག་ཁང་དུ་མཁན་པོ་མཛད། དགེ་འདུན་ཁྲི་ཕྲག་མང་པོའི་འདྲེན་པ་སུ་ཛཱ་