[A:936]དེའི་ཚེ་སྨྲ་བའི་ཁྱུ་མཆོག་ཆེན་པོ་རོང་སྟོན་ཐམས་ཅད་མཁྱེན་པས་ཞབས་ཀྱི་པདྨ་ལ་གཏུགས། དགེ་བའི་བཤེས་གཉེན་གཞན་ཅི་རིགས་པ་དག་དང་བཅས་པ་ལ་གདམས་པ་འགའ་རེ་གནང༌། སླད་ཀྱིས་ལྷ་སར་ཕེབས། དེ་ནས་སྲིན་པོ་རིར་སྨྲ་བའི་སེང་གེ་ཆེན་པོ་དང་དཔོན་སློབ་ལྷན་ཅིག་ཏུ་བཞུགས་པ་ལ་ཆོས་ཀྱི་རྒྱལ་པོ་ཆེན་པོ་གྲགས་པ་འབྱུང་གནས་པས་སྤྱན་དྲངས་ཏེ། ཆོས་གྲྭ་ཆེན་པོ་རྩེས་ཐང་དུ་ཐོགས་ཤིག་བཞུགས། དེར་ཆོས་ཀྱི་རྒྱལ་པོ་གྲགས་པ་འབྱུང་གནས་པ་དང་དེའི་བློན་པོ་ཆེན་པོ་དག་གིས་བདེ་མཆོག་ལཱུ་ཡི་པའི་བཀའ་སོ་སོར་གསན། སླར་ཡོན་མཆོད་ལྷན་ཅིག་ཏུ་གོང་དཀར་ཕྱོགས་སུ་ཐེགས། དེའི་ཚེ་སྲིན་པོ་རིར་མི་གཡོ་བ་བླ་ན་མེད་པའི་བཀའ་གསན། དེ་ན་བཞུགས་པའི་བདེ་མཆོག་གི་སྐུ་བཅོམ་ལྡན་འདས་དངོས་སུ་གཟིགས། དེ་ནས་པཎ་ཆེན་རིན་པོ་ཆེ་དཔོན་སློབ་ཀྱིས་སྤ་གྲོར་བྱོན་ནས་དེར་ཐོགས་ཤིག་བཞུགས། དེར་པདྨ་སཾ་བྷ་བ་དང་མཇལ། སླད་ཀྱིས་མེ་ཕོ་འབྲུག་གི་ལོ་ལ་སྣེ་གདོང་དུ་ཕེབས། དེ་ནས་དུས་མི་རིང་བར་རྩེས་ཐང་དུ་བཞུགས་ནས་སྣར་ཐང་མཁན་ཆེན་བསོད་ནམས་མཆོག་གྲུབ་པ་ཆེན་པོ་གྲགས་བཟང་པ་དང་ཆེན་པོ་བློ་གྲོས་རྒྱལ་མཚན་པ། ཐེལ་བ་མཁན་ཆེན་ཀུན་རྒྱལ་བ། སྨྲ་བའི་དབང་ཕྱུག ཆོས་ཀྱི་གྲགས་པ་རྣམས་ཀྱིས་གཙོས་པའི་བདག་ཅག་སྡེ་སྣོད་འཛིན་པ་སུམ་ཅུ་རྩ་གཉིས་ལ། སློབ་དཔོན་ཆེན་པོ་དཔེ་མེད་འཚོའི་ལུགས་ཀྱི་ཡན་ལག་དྲུག་གི་མན་ངག་ཚང་བར་གནང༌། སྔོན་བུ་རིན་པོ་ཆེས་དཔེ་མེད་འཚོའི་ལུགས་ཀྱི་མན་ངག་