[A:942]ཆུང་དུ་བྱོན་ནས་བསམ་གཏན་གྱི་སྟན་ལ་རྡོ་རྗེའི་སྐྱིལ་མོ་དཀྲུང་གིས་བཞུགས་ཏེ། སྐུ་དྲང་པོར་བསྲང་ནས་མཁའ་སྤྱོད་དུ་གཤེགས་པའི་ཚུལ་བསྟན། ཉི་ཤུ་གསུམ་གྱི་སྲོད་ཀྱི་ཆ་ལ་དུར་ཁྲོད་ར་མ་དོ་ལིར་སྐུ་གདུང་ཞུགས་ལ་བཞེན་པའི་སླད་དུ་སྤྱན་དྲངས་པའི་ཚེ། བལ་པོའི་ཡུལ་མཐའ་དག་སྣང་བ་ཆེན་པོས་ཁྱབ་པ་དང༌། ཞུགས་ཀྱི་མེ་ལྕེའི་རྩེ་མོ་འཇའ་ཚོན་དང་འདྲེས་ཏེ་ནམ་མཁའི་མཐོངས་མཐའ་མེད་དུ་སོང་བ་སོགས་ཐམས་ཅད་ཀྱིས་མངོན་སུམ་དུ་གྱུར་པའི་ཆོ་འཕྲུལ་ཆེན་པོ་བསམ་གྱིས་མི་ཁྱབ་པས། བལ་པོ་བ་ལང་དང་འདྲ་བ་རྣམས་ཀྱང་རིས་མེད་དུ་དད་པར་གྱུར་ཅིང༌། ཐར་པ་བླ་ན་མེད་པའི་སྐལ་བ་ཅན་དུ་མཛད་པར་སྣང་སྟེ། བདག་ཉིད་ཆེན་པོ་འདི་ནི་རྒྱུད་སྡེ་རིན་པོ་ཆེ་དག་ལས་གསུངས་པའི་སློབ་དཔོན་དུ་མི་འོས་པའི་སྐྱོན་དུ་བྱ་བ་ཇི་སྙེད་པ་དག་དང་ནི་བྲལ། ཡོན་ཏན་དུ་བྱ་བ་ནི་མ་ཚང་བ་མེད་པར་ཡོངས་སུ་རྫོགས་ཤིང༌། ཁྱད་པར་དུ། དཔལ་དུས་ཀྱི་འཁོར་ལོའི་རྒྱུད་ལས་འདོད་པའི་དངོས་གྲུབ་སྟེར་པ་པོ་དཔལ་ལྡན་བླ་མ་ཞེས་གང་གསུངས་པའི་མཚན་ཉིད་ཐམས་ཅད་མ་ཚང་བ་མེད་པར་ཡིད་ཆེ་པ་ལས། བདག་ཅག་རྣམས་ཀྱི་བླ་ན་མེད་པའི་སྐྱབས་གཅིག་པུ་བར་གྱུར་པ་ཡིན་ནོ། །
དེ་ལ་ལོ་ཙཱ་བ་ཆེན་པོ་བསོད་ནམས་རྒྱ་མཚོའི་སྡེ་ཞེས་བྱ་བ་ནི་སྔོན་གྱི་སྐྱེས་པའི་རབས་ཀྱི་ཕྲེང་བ་རྣམས་སུ་ཡང་ཚོགས་གསུམ་གྱི་སྤྱོད་པ་མུ་མེད་པ་སྤྱད་ཅིང༌། སེམས་ཅན་གྱི་དོན་ཕྱི་ཕྱིར་ཞུགས་པ་མཐར་ཕྱིན་པ། སྤངས་པ་དང་ཡེ་ཤེས་ཕུལ་དུ་དབྱུང་དུ་མེད་པའི་མངོན་པར་བྱང་ཆུབ་པ་བརྙེས་