[A:955]དྲུང་དུ་སྦྱོར་དྲུག་གི་ཁྲིད་ཀྱི་ལུང་གསན་པ་ཙམ་གྱིས་རྟགས་བཅུ་ཡོངས་སུ་ཚང་བར་གཟིགས་པ་དང༌། སྐུ་ལུས་བདེ་བས་གང་བའི་ཉམས་ཀྱི་འགྱུར་བ་ངོ་མཚར་ཅན་བྱུང་བར་སྣང་ཞིང༌། དིང་རིར་དམ་པའི་སྐུ་གདུང་དཀར་རུ་ལ་གཟིགས་སྣང་ཐ་དད་འོང་བ་ལས། སྐུ་ངོ་བོ་སྟོན་པའི་སྐུ་དང༌། མེ་ལོང་དུ་ཤར་བ་དེ་དམ་པ་ཉིད་ཀྱི་སྐུ་བལ་ཐུལ་མ་སྔི་ལྟ་བའི་སྤྱི་བོར་བྱང་ཆུབ་ཆེན་པོའི་མཆོད་རྟེན་ཆུང་ངུ་ཡོད་པ། དེའི་སྨིན་མཚམས་ནས་ཐིག་ལེ་ཅིག་བྱུང་བའི་ནང་དུ་སྟོང་གཟུགས་ཀྱི་སྣང་བ་རབ་འབྱམས་གཟིགས་པ་སོགས་གྲུབ་པའི་མཚན་མ་རྒྱ་ཆེན་པོ་མངོན་དུ་གྱུར་སྣང་ལ། སྟོང་གཟུགས་ཀྱི་སྣང་བ་རབ་འབྱམས་ཞེས་ལན་མང་པོར་འབྱུང་བ་འདི་ལས་ན། བསྐྱེད་རྫོགས་ཀྱི་ལྷ་དང་སངས་རྒྱས་བྱང་སེམས་དག་པ་རྡུལ་གཅིག་གི་སྟེང་ན་རྡུལ་དེ་སྙེད་ཀྱི་གྲངས་དང་མཉམ་པར་བཞུགས་པའི་ཡེ་ཤེས་ཀྱི་འཁོར་ལོར་དག་པ་ཐམས་ཅད་ཡེ་ཤེས་ཀྱི་གཟིགས་པ་ལ་མངོན་སུམ་དུ་གྱུར་བར་གོར་མ་ཆག་མོད། དེ་ལྟ་ནའང་ལྷོ་གྲོ་བོ་ལུང་གི་ཟངས་ཕུག་ཏུ་བལ་པོར་མཆོག་གི་དངོས་གྲུབ་བརྙེས་པར་འགྱུར་བའི་ལུང་བསྟན་པ་ནས་རང་བྱིན་བརླབས་ལ་སོགས་པའི་ཏིང་ངེ་འཛིན་རྣམས་ལ་བརྟན་པ་ཐོབ་པར་དབུགས་དབྱུང་བ་དང༌། བལ་པོར་ཐེགས་ཏེ། གྲུབ་པའི་དབང་ཕྱུག་ནགས་ཀྱི་རིན་པོ་ཆེས་བཅུ་གསུམ་གྱི་བདག་ཉིད་ཅན་གྱི་བཅོམ་ལྡན་འདས་སྡོམ་པའི་དཀྱིལ་འཁོར་ཆེན་པོ་ཕྱི་ནང་གསང་བ་དབྱེར་མེད་པའི་བདག་ཉིད་ཅན་དུ་དབང་གི་ཡེ་ཤེས་ལྷན་ཅིག་སྐྱེས་པ་མངོན་དུ་བསྟན་ཏེ། རིམ་པ་བཞི་པའི་འོང་