[A:966]ཐེས་ཀྱི་ས་ཆ་སྦྱོར་བ། བསམ་གཏན་གླིང་གི་སྒྲུབ་སྡེའི་བདག་རྐྱེན་རྣམས་ལ་སྦྱིན་བདག་ཆེན་པོ་རྣམས་ཀྱི་དད་པ་བསྐུལ་བ་སོགས་སྔོའི་ཡུལ་ལས་འདས་པའི་ཕྲིན་ལས་རྒྱ་མཚོའང་མངོན་དུ་མཛད། སྐུ་ན་གཞོན་ནུ་མཚན་ཉིད་ཀྱི་གསན་པ་མཛད་དུས་ནས་དཀོན་མཆོག་གི་དྲུང་དུ་ཉིན་རེ་ཞིང་ཞལ་ཟས་གཉིས་མ་དང༌། དཀར་མེ། དབྱར་རྒུན་དུ་རྐྱེན་བཞིན་འདུས་བྱས་པའི་མེ་ཏོག་སོགས་མཆོད་པ་རྒྱུན་མི་འཆད་པ་དང༌། རྗེ་ཉིད་ཀྱི་ཡབ་ཡུམ་གཉིས་དང༌། ཡོངས་འཛིན་ཞི་བར་དགོངས་པ་རྣམས་ཀྱི་གདུང་མཆོད་ལ་སོགས་པའི་ཚེ་དང༌། རྗེས་སུ། བཙན་ཐང་དང༌། ཁྲིམས་ཁང་གླིང་སོགས་སུ་དཔལ་རྩེ་དབྱིངས་གསུམ། ཁམས་གསུམ་རྣམ་རྒྱལ། འཇམ་དཔལ་སྒྱུ་འཕྲུལ་དྲ་བ་སོགས་དང༌། དགོན་པ་གསར་པར་དུས་འཁོར་ལ་སོགས་པ་དང༌། བྱམས་པ་གླིང་དུ་མཆོད་རྟེན་ཆེན་མོའི་རབ་གནས་དུས་སྒྱུ་འཕྲུལ་དྲ་བ་སོགས་དང༌། དོལ་ལྷུན་གྲུབ་ལྷ་རྩེ་དང་རྣམ་རྒྱལ་སོགས་སུ་སྦྲུལ་སྐུ་རིན་པོ་ཆེ་ཞྭ་དམར་བ་ལ་གསང་སྔགས་གསར་རྙིང་མང་པོ་དང༌། རྔོག་དཀྱིལ་བདུན་གྱི་བཀའ་གནང་པའི་དུས་སོགས་ཏེ། རབ་གནས་སྦྱིན་སྲེག་ལ་སོགས་དཀྱིལ་འཁོར་གྱི་ལས་རིམ་གང་དང་གང་དུ་གནང་བའི་དུས་ཐམས་ཅད་དུའང་། དཀྱིལ་འཁོར་གྱི་ལྷ་ཚོགས་དེ་དང་དེའི་གྲངས་མཚུངས་ཀྱི་མཆོད་པའི་ཁྱད་པར་བཟང་པོ་དང༌། དུས་རྒྱུན་གྱི་མཆོད་བཤོམས་ཀྱི་ཁྱད་པར་ཐམས་ཅད་ངན་དོན་དང་ཆ་ཕྲ་མོ་མ་ཡིན་པར་ཚོགས་ཆེ་ཞིང་དངོས་གཙང་བ་ཁོ་ནས་མཆོད་ཅིང་བཤོམ་པར་མཛད་པ་ནི། ནམ་མཁའ་མཛོད་