[A:991]སྦྱངས། དེ་ནས་སུམ་ཅུ་རྩ་དགུ་པ་ལ་པཎྜི་ཏ་སིངྷ་གུ་ཎ་ལ་ཚད་མ་ལོ་བཞིར་སྦྱངས། དེ་ནས་བཞི་བཅུ་རྩ་བཞི་པ་ལ་པཎྜི་ཏ་བློ་བརྟན་ལ་བྱ་སྤྱོད་དང་ཕ་མའི་རྒྱུད་ལ་སྦྱངས། དེ་ནས་ཁ་ཆེ་ལཀྵྨཱི་ཆེན་མོ་ལ་རྣལ་འབྱོར་ཆེན་པོ་ལ་བློ་སྦྱངས། དེ་ནས་ལྔ་བཅུ་རྩ་བཞི་ལ་བྲམ་ཟེ་ཐ་ག་ན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྦྱངས། དེ་ནས་རྡོ་རྗེ་གདན་གྱི་ནུབ་ཕྱོགས་སུ་མཁས་པ་རབ་བཟང་མདངས་ལ་མངོན་པ་བསླབས། དེ་ནས་སིངྷཏ་ར་དང་ཕྲད་ནས་ལོ་དྲུག་ཅུ་རྩ་བཞིའི་བར་དུ་རྡོ་རྗེ་གདན་དུ་རིན་པོ་ཆེའི་སྒྲུབ་པ་མཛད། དེ་ནས་ལོ་བདུན་ཅུ་རྩ་གཉིས་པ་ལ་ལོ་བཅུ་དྲུག་ལོན་པ་ལྟ་བུར་གྱུར་ཀྱང༌། མཁས་པ་འབྱུང་བའི་གནས་གཞིར་བཤད་པར་འདོད་པ་ལས། ཤེས་རབ་ཀྱི་ཕ་རོལ་དུ་ཕྱིན་པ་ལ་གོམས་པའི་རྣལ་འབྱོར་མ་པདྨ་ཅན་ཞེས་པ་དང་ཕྲད་དེ། དེ་ན་རེ། རང་ལ་སངས་རྒྱས་ཡོད་མོད་ཀྱང༌། །མ་རྟོགས་སེམས་ཅན་སྙིང་རེ་རྗེ། །ཐ་སྙད་རབ་ཏུ་མཁས་གྱུར་ཀྱང༌། །སེམས་ཀྱི་དེ་ཉིད་མ་རྟོགས་ན། །དབུལ་པོས་ཕུག་པོ་བརྡུངས་པ་བཞིན། །དེ་ལ་འབྲས་བུ་འབྱུང་མི་སྲིད། །ཚེ་ཡི་རིག་འཛིན་བརྙེས་གྱུར་ཀྱང༌། །འཇིག་རྟེན་བྱ་བ་ལ་ཆགས་ན། །ཆགས་སྡང་འདམ་དུ་ཆུད་པའི་ཕྱིར། །བདེ་བ་མ་ཡིན་སྡུག་བསྔལ་འབྱུང༌། །ཀྱེ་སྐྱེས་བུ་རང་སེམས་རྟོགས་ལ་ཅིར་མིན་ཉམས་སུ་ལོང༌། །བླ་མ་མཆོག་བསྟེན་གདམས་ངག་ལ་འབད་བྱོས། །འཇིག་རྟེན་ཆོས་བརྒྱད་ཐོང་ལ་བདེ་ཆེན་སྤོར། །འཁོར་བ་སྐྱེ་མེད་དག་ཏུ་རྒྱ་ཡིས་ཐོབ། །ཅེས་ཟེར་ནས་དེ་ནས་རྣལ་འབྱོར་མ་དེ་དང་སྤྲུལ་པའི་ཁྱེའུ་གཉིས་