[A:1016]thabs ji lta bus lam la 'dzud pa'i thabs de la bya la/ don mthun pa ni slob ma lam gang bstan pa'i lam de nyid la bla ma yang gnas pa la bya ba yin pa'i phyir/ dam pas kyang slob ma 'khrid pa na rten sdom pa gsum ldan/ lam dka' thub gyi srangs/ 'bras bu gzhan don gyi spyod pa gsum gyis 'khrid par mdzad pa'i phyir dam pa nyid la yon tan de dag ji ltar mnga' ba brjod par bya ba yin no/ /
de yang dam pa'i yul ni rgya gar lho phyogs be da la'i yul 'khor du gyur pa tsa ra sing ga de'i bye brag khron pa'i gling skyes bo dad pa can mang du gnas pa'i sar/ yab nor bu rin po che len pa'i rigs can brtson 'grus go cha dang / yum dkon mchog mchod pa la mkhas pa spos sbyor la brtson pa'i rigs pa ra sa ha zhes bya ba'i sras su 'khrungs te/ yum la 'khrungs ma thag nyid las tshems dang ldan pa zhig ste/ bram ze mtshan mkhan la rtog tu bcug pa na yang 'dis paNDi ta dang rnal 'byor pa gang byas kyang mngon par shes pa la sogs pa phul du byung ba'i yon tan dang ldan par 'gyur ro zhes lung bstan/ skye ba bdun pa yin pas sdig pa'i dri ma med cing dge ba la ngang gis dga' ba ste/ chung ngu nas sgra rig pa la sogs pa'i rig pa'i gnas mtha' dag la sbyangs pas mkhas par gyur te/ de ni rigs khyad par can dang ldan pa'i yon tan no/ /de nas bi kra ma shI lar mkhan po dge ba'i lha las rab tu byung nas dam pa'i chos 'dul ba la mkhas shing so so thar ba'i sdom pa mchog tu gyur la/ bla ma gser gling ba las byang chub