[A:1041]mo gru pa tshogs su byon pa la la la phyam tshe 'ding / la la chos gos 'dings kyi 'dug pas/ dgyer grwa pa gsar par song bas lam gyi mtha' gcig tu phyam tshe bting bas 'gro mgon de ngos su skyogs nas byon te/ khong rang gi phyam tshe'i steng du zhabs bzhag nas spyan cer gyis gzigs nas dge slong rdo rje 'dzin pa ngo mtshar che gsung / bdag dge tshul lags zhus pas dge tshul yin kyang dge slong rdo rje 'dzin pa ngo mtshar che gsung / chos nyan pas bla ma sangs rgyas su mthong / bde gsal mi rtog pa'i nyams khyad par can rtsol med du skyes/ thabs lam chos drug la sogs pa'i gdams ngag yams shig zhus/ de nas yul du rgyags len du byon pas yab dgras gzung nas 'khrug pa byed dgos byung / de'i bar la dpal phag mo grub pa sku gshegs/ der skyo shas drag po skyes nas bla ma bzang po cig gi drung du 'gro dgos snyam pa la/ ston pa gcig na re/ dwags po'i slob ma rnal 'byor chos g.yung bya ba khyad par can cig bzhugs zer bas/ mtshan thos pa tsam gyis mos gus skyes nas mjal du byon pa la/ ljang gi mdar sleb tsa na 'di'i phu na mal ka ba can pa zhes bya ba grub thob cig bzhugs pa thos nas mjal du byon pas/ jo mo dang mjal nas mjal kha zhus pas/ btsun pa'i 'khor gyis dgos pa med nang du ma btang cig gsung ba la/ khyi'i lto snod g.yar nas ma bkrus par ja bskol bas/ de bla mas gsan te/ rnal 'byor pa gtub pa cig 'dug gsung nas dgyes/ /mjal kha btang /