[A:1096]mong du mdzad/ de phyin chad nas bla ma mang po la gsan pa mdzad de/ dge bshes mtha' bzhi la phar phyin dang dbu tshad gsan/ nA ro'i thabs lam zhus pas myong ba khyad par can skyes nas gdams ngag 'phrig tshud/ lo nyi shu rtsa bzhi pa las bdag gi rtog gzhi byung bas/ gru go cha'i tsha 'o gru rnam grags bsam yas bltar byon pa la/ gru'i shog dril zab mo rnams zhus/ mkhar ru sgang du sku mtshams mdzad pas rtog gzhi rnams mgo non/ de nas stod lungs su ba ri la don rgyud zhur byon pas khong mtshams bsdams pa dang thug zhong pa stengs su rgyal ba dkon skyabs kyi sar byon nas smra ba seng ge'i don rgyud zhus pas/ dang po gdams pa la rtseg ge byung / nyin cig chos kyi skad kyi gleng mo dpon slob rtsod pa shor bas jo sras 'brog po na re/ dge bshes 'di gtsang sil ma la man chad na chos mkhas par grags/ slob dpon gyis ga na thub byas pas/ de ltar yin par ma shes/ bzod par gsol lo gsung nas gdams ngag rnams lhug par gnang / skam gyi gdam pa dang / rma'i thun bcud/ 'brom ye shes 'bar gyi mtshan brjod gser thur sogs zhi byed kyi gdams pa mang du zhus/ nad gzhi la yang phan pa byung / der zla ba gsum bzhugs/ de'i sang phod dgung lo nyi shu rtsa lnga pa'i rgyal gyis nya ba'i mtshan mo thun bcud kyi tshul du nyams su blangs pa'i tshe rtogs pa'i ye shes phyin ci ma log pa thugs la 'khrungs/ 'khor 'das kyi chos thams cad ming tsam du grol bar gyur/