[A:1112]rgyu sgrib pa dag pa'i rtags/ lam rlung lnga zin pa'i rtags/ 'bras bu dag snang shar ba'i rtags bla ma gong ma la ji ltar shar ba bzhin byung / nyin mtshan med pa'i snang ba shar/ rtsig pa la thogs rdugs med pa sogs byung / don la spros pa chod pa'i steng du bde gsal gyi nyams me dpung 'bar ba bzhin du byung bas dran med du bkrabs mchi ma mi thub pa'i dga' spro byung / lo sum cu rtsa gsum la mtshan brjod kyi sgrub pa mdzad pas pad mo'i sdong bu kha phye ba'i nang du 'jam dbyangs lha bdun gzigs/ sum cu rtsa lnga la lha sar mchod pa skyel du byon pas spyan ras gzigs kyi thugs ka nas ku mu ta lta bu'i 'od byung ba spyi bor thim/ so brgyad pa la rin po che'i sku 'dab dus gsum khegs pa de'i zhor bteg zhig po bsam yas su mchod pa'i phyag phyir byon pas/ rta mgrin gyi thugs ka nas 'od bye ru bcag pa lta bu byung ba thugs kar thim/ bzhi bcu pa la snye mdor 'dag 'byar mdzad pas 'od dmar po byi ru 'dra ba byung ba de rta mgrin du gyur nas 'od dmar pos ngams shod khengs/ rta skad thengs gsum bsgrags pa'i dang po dbus gtsang ru bzhir thos/ phyi ma gnyis de yang mi tshad par thos te/ de thams cad mkhyen pa la snyan grags 'ong ba'i brda yin gsung / zhe gcig pa la mkhar chur byon pa'i tshe mkha' 'gro mas lam ston pa/ smyong kha dga' ste mtsho hUM sgra sgrogs pa/ yang dag gi sgrub pa mdzad pas sgrub rdzas kyis snod khengs shing bdud rtsi'i char bab/