[A:1116]sgrub pa la rig ma mtshan ldan dgos/ 'di mtshan dang ldan pa yin gsung nas yang bos byung / de nas zhi byed kyi skor ma lus par zhus/ nyams thod rgal ba skyes/ nyi shu rtsa gcig pa la bde gshegs chen po nyid la mnga' ba'i zhi byed brgyud pa snga phyi bar gsum thams cad gnang / bsnyen pa bskyal bas rgyu lam 'bras bu'i rtags thams cad tshang / ri khrod du song la zhig po'i chos thams cad tshang bar zhus shig gsung bas zhig po'i drug du phyin pa na/ 'di la nga'i chos kyi gtad sa 'ong / chos bdag pher ba zhig 'ong / mi res pus mo la 'bab pas do nub rang bya dgos gsung nas/ brgyud pa phyi ma la gtso bor mdzad pa'i snga phyi bar gsum tshang bar gnang / bde mchog nam mkha' dang mnyam pa'i dkyil 'khor du dbang bskur ba'i tshe/ bla ma dang gtso bo tha mi dad pa'i mos gus skyes/ ji zhig ltar la 'od kyi phung por song / snang la rang bzhin med pa'i ngang nas bde gsal mi rtog par gyur/ rten 'brel gyi khang par bcug nas brgyud pa gtod pa'i cho ga yang mdzad/ nyi shu rtsa gnyis pa la bde gshegs chen po gshegs khar mya ngan chen po byung bas bde gshegs chen po'i zhal nas rnal 'byor pa 'chi ba la mya ngan bya mi dgos/ phyi rtog ge'i rigs pa la blo ma sbyangs kyang nang nyams rtogs kyi 'char tshul khyod bzang bar 'dug thugs dam la brtson par mdzod dang 'gro don rgya chen po 'ong bar 'dug gi gsung / gshegs rjes nyin par mya ngan gyis non kyang mtshan mo rmi lam