[A:112]yang / kha che paN chen gyis snar glas mo cher dbyar gnas mdzad/ me tog phreng rgyud gsungs pa la seng ge zil gnon dang shangs pa jo ston gyis gsan nas gnyis kas TI ka re re mdzad/ seng ge zil gnon la tshad ma'i skyes bu bsod nams mgon pos gsan/ de la bu ston gyis zhus so/ /de rnams ni 'dul 'dzin chen po bu'i gsung rab las 'byung ba bzhin bris pa yin/
gzhan yang sha mi'i slob ma klubs dkar tshul khrims grags/ de'i slob ma snubs 'dul ba 'dzin pa ste g.yam bzang chos rje dang / grwa mi la sogs pa mang po byung la/ grwa mi'i slob ma rgya dur gyi mkhan po dar ma ye shes/ de'i slob ma zangs chen pa dar ma bsod nams/ de'i slob ma mtsho sna ba shes rab bzang po ste/ 'di gnyis la brten nas gnyal gyi zangs po che dang bra gor la sogs pa na 'dul ba'i bshad rgyun da dung du bar ma chad par yod do/ /rgya dur dar yes kyi slob ma mkhas btsun dad pa mgon gyis spyan g.yas su byon nas 'dul ba'i bshad pa mdzad pas der yang 'dul ba'i bshad rgyun brgyud pa bcu tsam gyi bar du byung la/ de'i gong du yang grwa pa'i dngos slob don stengs pa la sogs pa dang / lho pa thams cad mkhyen pa la sogs pa'i 'dul ba 'dzin pa mang du byung ngo / /
yang yam shud rgyal ba 'od kyis btab pa'i khrab la khar yang / kho bo'i tshe stod yan du 'dul ba'i bshad pa bar ma chad pa byung ngo / /