R909: deb ther sngon po/ {bod yig glog rdul dpe cha/}

[A:1254]bzhugs/ de'i tshe bka' gdams kyi gdams pa sku nyams su bzhes pas thugs rgyud shin tu mtho bar gyur ba'i mkhan chen chos skyabs bzang po dang / gsang ba'i bdag po'i sku dang gsung dang thugs kyi snang bas byang chub sems dpa'i spyod pa las skad cig kyang mi g.yo bar gyur pa'i mkhan chen las kyi rdo rje gnyis las dpal mar me mdzad ye shes las 'ongs pa'i lam gyi rim pa dag gsan nas sku nyams su bstar/ re shig gnyal gyi mo la'i rtsar zhags mdzad pas/ khyod sangs rgyas 'jig rten du byon pa dang 'dra ba cig 'ong bar shes par gyis shig ces pa'i lung bstan pa brnyes/ yi dam gyis kyang 'dul ba'i bslab pa la brten nas gzhan la phan pa chen por 'gyur bar lung bstan pas thog mar dpon slob rnams kyi bla gos dras shing drubs pa dang lhung bzed dang gding ba la sogs pa'i yo byad rnams bsnams nas gzhan dag gis mthong ba na/ rab tu byung ba'i tshul ni 'di lta bu zhig kho na'o zhes yid ches par 'gyur bar mdzad nas/ phyis ni lo re'am zla re tsam chos nyan par rtsol ba'i slob ma dag kyang 'dul ba'i kun tu spyod pa la bkod pas mngon sum du gyur ba lta zhog rgyang ring po nas thos pa dag kyang spu long g.yo bas phyogs thams cad du snyan pas khyab ste 'gran zla med par gyur/ so so thar pa tsam gyis chog mi shes par slob ma rnams smon pa dang 'jug pa'i bdag nyid can gyi byang chub kyi sems la bkod de/ de'i bslabs pa'i gnas dag la ji ltar slob pa'i tshul gyi bstan bcos kyang mdzad/ byang