[A:1262]longs spyod shin tu che bar mdzad do/ lo de'i dgun chos nas 'jam dbyangs grags pa 'byung gnas pa shing pho rta la 'khrungs pa'i lo bco lnga pas gdan sa mdzad de/ chu pho byi ba'i zla ba drug pa la rtser thegs nas lo ngo bcu gnyis kyi bar la gdan sa med kyang rtse nyid nas spyan zur gyis btsas te/ lha chen gtsug lag khang chen mo dang / gser gyi bka' 'gyur bzhengs nas bzhugs su gsol/ grwa sar nag chang gi khrims sdom pa dang / 'chad mnyan pa rnams la thugs rtsis shin tu che bar mdzad do/ de rjes shing pho byi ba nas drung kun dga' legs pa'i 'byung gnas rtses thang nas sor bzhugs su bcug me pho stag gi lo la bshad gsar mdzad/ sa pho 'brug gi lo'i dbyar rtser thegs/ sa 'brug de nas ches sangs rgyas rgyal mtshan pas gdan sa ma mdzad kyang / nang sor lo bcu bzhugs nas me mo glang gi dgun gshegs/ de rjes me mo phag gi lo la rdo rje rin chen dbang gi rgyal mtshan zla ba bdun pa la gdan sar phebs te/ chos sde chen po 'di ni bstan pa ma tshang ba med pa'i gnas dang / de dag bshad pa dang nyan pa'i tshul chad med pa/ skye bo thams cad kyi 'dod dgu 'byung ba'i gnas/ chos smra ba yul dang yul du rgyu ba dag la 'jigs pa med pa'i skyabs su gyur pa'o/ de lta bu'i sde chen po 'di ni lcags mo yos bu'i lo la btab nas/ me pho spre'u yan chad la lo brgya dang nyi shu rtsa drug song ngo / rtses thang pa'i skabs so/ /