[A:137]yang 'bro gza' dI pa~M` la sogs pa bud med grub pa thob pa'ang mang du byung / de rnams phal cher 'das shing rgyal khrims zhig phyogs rigs kyi 'khrug pa dar ba'i dus su snubs sangs rgyas ye shes rin po che zhes bya bas rgya gar dang bal po dang bru sha'i yul na gnas pa la sogs pa'i mkhas pa'i skye bo mang po bsten/ khong gi bla ma bru sha'i lo tsA ba che btsan skyes kyis mdo dgongs pa 'dus pa bod du bsgyur ba de rnams legs par mkhyen cing / nus pa phun sum tshogs pas bod yul gyi lha srin thams cad kyis stang phul/ lo brgya dang bcu gsum du bzhugs nas gsang sngags kyi bstan pa dar bar mdzad/ khong 'das rjes ring por ma lon pa zur che chung la brten nas/ rgyud sgrub thabs kyi bshad pa'ang shin tu dar/ zur chung pa'i lo bzhi bcu rtsa gcig pa la jo bo rje bod du byon no zhes bya ba ni spyir bstan pa'o/
khyad par du gnam ri srong btsan yan chod du ni/ tho tho ri gnyan btsan gyi ring la dam pa'i chos kyi dbu brnyes shing / gdung rabs rnams kyis kyang gnyan po gsang ba la mchod do zhes bya ba tsam las gzhan ci yang ma thos la/ srong btsan sgam pos gsang sngags kyi sgrub thabs lha zhi khro sna tshogs pa bsten pa gnang nas/ lha de dag grub pa'i skyes bu mang du byung snang zhing / de nas mes ag chom yan du gsang sngags kyi sgrub pa gsangs te spyod pa mang du byung la/ spyan ras gzigs la gsol ba 'debs pa dang yi ge drug pa 'don pa ni bu chung yan chod bod 'bangs thams cad du dar