[A:153]rten du tshad ma cig dgos pa 'dug gsung / spang ka dar chung ba'i sar tshad ma nyan du song ngo / /de ltar gsum gyis bstan pa ma 'khyongs pas grwa pa bskyang dgos pa byung nas byon pa lags skad/ de gsum go ma chod du song ba'i rgyu mtshan yang de lags/ gcig ni lha khang ma 'byongs pa la lha rje 'ug pa lung pa sku gshegs te/ nga'i lag rjes 'di khyod kyis sbyongs shig gsungs nas bla ma'i bka' byung bas byon pa yin no/ /de la slob ma ka ba bzhi/ gdung brgyad/ phyam bcu drug dral ma sum cu gnyis/ sgom chen mi gnyis/ yus po che mi gcig dkyus pa mi gnyis/ sta gur mi gnyis/ go ma chod mi gsum pa la sogs mang du byon no/ /ka ba bzhi po 'di/ dang po dge bshes khyung po grags se'i grwa pa mtshan nyid pa chen mo shin tu mkhas pa yin pa la/ dge bshes khyung po dang lha rje chen po gnyis yon bdag gcig gis myang ngor gdan drangs nas chos stabs gcig tu btsugs te 'dzom pa'i dus su/ dge bshes khyung po'i zhal nas/ zur chung shes rab grags bya ba chos log mkhan 'di sun phyung la shog gsungs nas/ khong bzhi po btang ba na/ khong bzhis yang lha rje'i spyan sngar phyin te/ thog mar skyo ston shAka yes dris pa/ lha rje chen po lags/ khyed rdzogs pa chen po ba'i lugs kyi sgom kho na la gtso bo mdzad pa lags sam zhus pas/ nga dmigs pa gang la gtad 'dug gsung / 'o na mi sgom pa lags sam zhus pas/ nga gang la g.yengs 'dug gsungs