[A:192]bdag cag gi bla ma rje btsun sangs rgyas rin chen rgyal mtshan dpal bzang po zhes grags pa de ni/ yab kyi lnga bcu rtsa drug pa lcags pho stag la rta nag gnas gsar du 'khrungs/ lcags stag 'di phag mo gru pa 'khrungs nas nyis brgya dang bzhi cu rtsa gcig pa yin/ lo 'di la mkha' spyod pa dang / mkhan chen rin po che rgyal bzangs pa yang 'khrungs/ yab la mi rnams kyis/ khyed kyi sras 'di phan ni mi thogs/ de tsam gyi tshis kyis ci bya zhus pas/ 'dis 'gro ba la phan thogs pa cig 'ong gsung nas lung bstan/ dgung lo drug pa la gsang ba snying po'i rgyud thugs su chud pa zhig rin po che shAka 'byung ba'i spyan sngar byon pas/ nga'i bla ma'i sras gsung nas gces gces mdzad pas brjed de/ yang lo brgyad lon pa na thugs la btsud/ cho ga phrin las rnams kyang yab kyis legs par bslab pas/ dgung lo bcu bzhi bzhes pa na gzhan la dbang bskur ba'i slob dpon pher ba byung / yab las sgyu 'phrul skor gyi chos rnams legs par thugs su chud pa na/ da nga rab tu byung ba zhig byas nas mtshan nyid kyi pu ti 'ga' re dang gsar ma'i rgyud sde 'ga' re yang slob pa yin zhus pas/ de legs po ni yin/ 'on kyang nga la khyod gcig pu las med pas/ jo mo zhig longs la sras tsha zhig byung ba na/ gzod rab tu byung bas chog gsung bas/ nyi shu rtsa bzhi pa la ma cig 'di blangs/ de la sras po drug dang sras mo gnyis/ yum gzhan pa zhig la yang sras gcig byung /