[A:194]sgyu 'phrul brgyad cu pa dang / bla ma gnyis dang / yang dag rtsa ba'i lung rnams kyang gnang / snying thig gi spros bcas la sogs pa'i dbang bzhi dang / me long rdo rjes mdzad pa'i khrid yig gi steng nas khrid/ rdzogs pa chen po a ro'i man ngag kyang khrid du mdzad/ thugs rje chen po'i dmar khrid 'jam dbyangs bsam grub rdo rjes byang sems rgyal ba ye shes la gsan/ de la chos rje nyid kyis gsan te/ chos rje bla ma'i khrid yig gi steng nas de yang bdag la gnang ste/ gsang sngags rnying ma zhes grags pa'i phyogs la lhag par mos pa thob cing / chos spong ba'i sgrib pas ma sbags tsam mo/ dgung lo bdun cu rtsa gnyis pa lcags mo lug gi lo la dbus su phebs/ chu pho stag la bsam gling du dbang grags pa rgyal mtshan gyis zhabs nas bteg ste/ 'dus pa mdo'i dbang la sogs pa dbang mang po dang / gsang snying la sogs pa'i bshad pa dang lung mang du mdzad de/ 'brug gi lo la gtsang du phebs/ dgung lo brgyad cu rtsa gnyis pa lcags mo phag la gshegs/ lcags phag de nas me pho spre'u 'di yan du lo bzhi bcu rtsa drug song / spyir zur chung pa 'khrungs nas me pho spre'u yan la lo bzhi brgya dang drug cu rtsa gsum song ngo /
yang rgyas sman stag rtse sar gdung rus gnyal/ mtshan sangs rgyas grags zhes bya ba byung ste/ des dang po dzambha la bsgrub pa'i mthar zhing chung zhig yod pa chus khyer te/ de nas bya bral la byon pas spu gu