[A:238]mtsher tsam re phul bas shin tu dgyes/ bdag gis zhus pa'i rjes su yang zhu mi mang po byung ba la/ spyan mi gsal yang gzhan gyis bklags pa'i rjes su brjod de tshar mang du gnang ba mdzad/ dgung lo dgu bcu rtsa gcig pa shing pho rta'i lo'i dpyid kar zhi bar gshegs/ gdung sbyangs pas nang ring bsrel gyis gang ba'i thugs kyang byon nas ring bsrel zad med du 'byon pa 'di yin no/ rdo rje zam pa'i lo rgyus kyi skabs so/ /
man ngag gi sde'i lo rgyus kyi skabs/
shin tu zab pa rdzogs pa chen po snying thig gi lo rgyus ni/ shrI singha yan chad sems phyogs dang mthun zhing / shrI singhas mkhas pa ye shes mdo la bshad/ des slob dpon bi ma la mi tra la bshad/ bi ma la mi tra ni sangs rgyas gsang ba'i yang dngos kyi slob ma ste/ sgyu 'phrul gyi skor rnams ni sangs rgyas gsang ba las bi ma la dang / des rma rin chen mchog la'o/
/de la slob dpon bi ma la mi tra yang / chos rgyal khri srong lde btsan nas mnga' bdag ral pa can gyi bar du/ bi ma la mi tra snga phyi gnyis byung ba sngon gyi yi ge dag la snang ste/ snga ma ni chos rgyal khri srong lde btsan gyi dus su byung ba/ rab tu byung ba'i cha byad du med par rnal 'byor pa'i cha byad du yod pas/ rgyal blon rnams phyi pa dang nang pa gang yin the